После напорен ден исполнет со бројни обврски и, често, стресни ситуации, би било добро слободната вечер да ја искористите за одмор и релаксација. Потрудете се во текот на денот на издвоите барем неколку минути во кои ќе се концентрирате на правилното дишење. Кога сме напнати често се случува плитко да дишеме или, пак, да го задржуваме здивот. Едноставно седнете во удобно столче и исправете го грбот. Потоа полека вдишувајте додека броите до 5 и издишувајте подеднакво долго. Концентрирајте се на вдишувањето и издишувањето, и продолжете вака да дишете 3 до 5 минути. Оваа техника на дишење го забавува срцевиот ритам и смирува.
Масажата на лицето и главата со врвовите од прстите ја отстранува напнатоста и ја ублажува главоболката. Кај главоболката најдобро е благо да се масираат слепоочниците и пределот на лицето меѓу очите и ушите.
Исто така, навечер барем од 15 до 30 минути, обидете се да ги исклучите телефонот, компјутерот, телевизорот и сите уреди кои ви ги окупираат очите, рацете, вниманието и мислите. Најнакрај, пред спиење, присетете се барем на три убави настани или детали кои сте ги забележале во текот на изминатиот ден и кои ви разубавиле некои моменти, ако не и целиот ден. Тоа може да биде нечија насмевка, нежен збор, добра вест, комплимент, пријатен мирис, моменти поминати во друштво на драги лица… Овој кус преглед на пријатни доживувања ќе ви помогне да заспиете со ведри мисли и насмевка на лицето.
