Скопје, 21 март, 2020 – Вкупната бројка на пациенти со коронавирус во земјава, до утрово изнесува 76. Сите пациенти, според вчерашните кажувања на министерот за здравство, Венко Филипче, се со релативно стабилна клиничка слика – лесна до средна. Единствената пациентка која веќе неколку дена е на механички асистирана вентилација е во критична состојба, но се прават напори во однос на дополнителна поддршка и терапија за подобрување на нејзината состојба.
Во текот на вчерашниот ден извршена е и визита на пациентите кои се на домашно лекување и тие се во стабилна состојба и не се хоспитализирани и се лекуваат дома, од причина што нивната состојба тоа го дозволува.
Во насока на реорганизација и зголемување на достапноста за земање брисеви, на територијата на Скопје од понеделник ќе функционираат два пункта, во рамки на Здравствениот дом Скопје во поликлиниките Чаир и во Јане Сандански. Пациентите ќе закажуваат телефонски, преку системот МојТермин, со што значајно ќе се зголеми достапноста до оваа услуга,
Од утре, на граѓаните во насока на консултации, прашања, поддршка и помош со коронавирусот и новонастанатата ситуација со КОВИД-19, ќе им биде достапна дополнителна бесплатна телефонска линија 24 часа. Телефонскиот број е: 0800 00203
Инаку, на светско ниво, бројката на заболени лица, во изминатите 12 дена се зголеми за 100 илјади и во моментот вкупниот број заболени во светот е близу 250 илјади лица.
