Скопје, 22 март, 2020 – Во последните 24 часа, евидентирани се нови 9 лица заразени со коронавирус, со што вкупната бројка на пациенти заболени од КОВИД-19 изнесува 85. Случаи на заболени со оваа болест има во градовите: Скопје, Дебар, Штип, Кавадарци, Гостивар и Охрид.
Според министерот за здравство, Венко Филипче, сите хоспитализирани пациенти на Клиниката за инфективни болести и фебрилни состојби во Скопје се со полесна клиничка слика, со исклучок на тројца заболени кои имаат потешка пневмонија, но се сепак стабилни и едната пациентка која е на респираторна машина и која веќе неколку дена наназад е во критична состојба. Според ресорниот министер, сите останати пациенти кои се на домашно лекување се во добра состојба и тие се во постојан контакт со лекарите од Инфективната клиника.
Истовремено, од понеделник, сите пациенти ќе можат да се јават и кај својот матичен лекар, а не само на телефонските линии за информации на центрите за јавно здравје. Доколку вашиот матичен лекар согласно електронскиот алгоритам, постави индикација, веднаш ќе може да закаже термин за земање на материјал за испитување за евентуално постоење на коронавирус, во еден од двата пункта – поликлините Чаир и Јане Сандански.
За точната бројка на новозаразени, состојбата на хоспитализираните пациенти со коронавирус, како и сите информации поврзани со здравјето на сите граѓани во земјава, Министерството за здравство ќе информира секој ден, точно напладне.
