Скопје, 23 март, 2020 (обновено) – Во изминатите 24 часа се регистрирани 22 нови случаи на коронавирус во земјата. По градови: Скопје (15), Дебар (4), Куманово (2) и Охрид (1). Со ова, вкупната бројка на дијагностицирани пациенти со КОВИД-19 денеска до 12.00 часот, изнесува 136. Според податоците од министерството за здравство, евидентиран е и уште еден смртен исход од новиот коронавирус.
Во последното деноноќие, во земјава е регистриран и првиот смртен случај на пациент заразен со коронавирус.
“За жал го имаме и првиот смртен случај од коронавирусот, кој посмртно во Куманово беше дијагностиран доцна синоќа. Се работи за жена на 57 годишна возраст, на која навремено и биле земени два теста и двата теста иницијални покажале негативен резултат. Но, и покрај негативните резултати, заради тоа што болеста била типична за коронавирусот таа била третирана во изолација. Тој период на хоспитализација траел изминатата недела во Општата болница во Куманово. Брис е повторно земен по констатација на смртта во текот на вчерашниот ден – вечерта и тој бил позитивен. Брисот е земен заради наглото влошување на состојбата заради тоа што тоа е нетипично за друга болест и тоа ги натерало колегите повторно се посомневаат и земат уште еден трет брис“, изјави министерот за здравство Венко Филипче.
При тоа, тој посочи дека и синот на починатата жена од Куманово е позитивен на коронавирус, на кого во текот на вчерашниот ден исто така му се влошила состојбата и кој од Клиниката за пулмологија, доцна синоќа е згрижен на Клиниката за инфективни болести. Тој засега е во стабилна здравствена состојба.
Од денес, почнуваат да функционираат вкупно 14 пунктови во земјава каде ќе се тестираат по 50 лица по епидемиолошки индикации и 120 со закажување по претходна најава кај матичниот лекар. Матичниот мора да пополни алгоритам кој ќе укаже на тоа дали пациентот, односно граѓанинот треба да биде тестиран или не.
♦ Во изминатите 24 часа регистрирани се 29 нови случаи на лица болни од КОВИД-19 со што вкупниот број на дијагностицирани пациенти изнесува 114 лица.
♦ Дваесет и две лица се од Скопје, три од Штип, двајца од Дебар и по еден од Куманово и од Охрид.
♦ Според местото на живеење, досега вкупно 65 случаи се регистрирани во Скопје, 36 во Дебар, 7 во Штип, по 2 во Кавадарци и во Охрид и по 1 случај во Гостивар во Куманово.
♦ На Клиниката за инфективни болести и фебрилни состојби во моментов се хоспитализирани 24 пациенти. Од нив 7 пациенти се континуирано на третман со кислородна маска, 11 се во стабилна добра здравствена состојба.
♦ Денес, по истекување на 14. дена од поставување на дијагнозата, кај 6 пациенти ќе биде земен контролен брис. Од нив 5 се во добра состојба, додека шестата пациентката која е со влошена состојба и која е поставена на респираторна машина, е со непреоменета здравствена состојба.
♦ Пациентите кои се на домашно лекување се во континуирана комуникација со лекарите од Инфективната клиника, а од утре целосно во функција системот на комуникација со медицинската сестра одговорна токму за оваа работа и по потреба консултација со лекар специјалист во било кое време за проценка на нивната состојба.
Според министерот Филипче, по одлуката за воведување на полициски час во земјава од 21 до 06 часот, се размислува да се воведат и мерки со кои дополнително би се заштитиле најкритичните, најризични групи граѓани и тоа преку Комисијата за заразни болести.
“Се работи за мерка за лицата над 65 години за кои сметаме дека и дополнително освен полицискиот час треба да им биде ограничено движењето преку ден, нормално со дозвола да се движат во раните утрински часови за што детали ќе соопштиме денес. Подготвуваме и дополнителни мерки за лицата посочени дека најчесто го шират вирусот, а тоа се лицата до 18 години“, изјави министерот за здравство.
