Скопје, 25 март, 2020 – Од денес, сите пациенти со коронавирус, за кои ќе биде поставена индикација од лекар, ќе се лекуваат со првата одобрена терапија против КОВИД-19. Станува збор за комбинација од два лека, за која постојат докази дека може да помогне во излекувањето на заразата со коронавирус.
Според министерот за здравство, Венко Филипче, во последните 24 часа регистрирани се 12 нови случаи на коронавирус и тоа 7 во Скопје, и 5 во Куманово. Вкупната бројка на дијагностицирани пациенти со КОВИД-19 изнесува 148.
Според местото на живеење, досега случаи на КОВИД-19 се регистрирани во:
- Скопје (88)
- Дебар (40) – од кои 1 починат
- Куманово (8) – од кои 1 починат
- Штип (7)
- Кавадарци (2)
- Охрид (2)
- Гостивар (1)
Во моментов, на Инфективната клиника згрижени се 29 пациенти, од кои една е во тешка општа состојба на респираторна машина. Иако кај шест пациенти е евидентирана потешка клиничка слика, тие се уште се респираторно самостојни, без вентилаторна поддршка.
Од вчера, веќе е почнато тестирањето на сите лица кои беа во врска со случајот со заболената директорка на Клиниката за дерматовенерологија.
“ Од вчера, одделението за трансфузиологија во Охрид е затворено заради тоа што персоналот бил во контакт со лице коешто како пациент отишло да подигне терапија преку системот „Мој Термин“, за после неколку дена да развиле симптоми и да му се дијагностицира коронавирус. Сите 10 вработени – доктори, медицински сестри, помошно-технички персонал кои биле во контакт со пациентот се во домашна изолација. Во таа насока, целосно е преземена службата за трансфузиологија од одделението коешто се наоѓа во специјалната болница св.Еразмо. Крвоснабдувањето во ниту една болница – болничка установа во Охрид не е загрозено“, истакна ресорниот министер Филипче.
Тој информираше и дека по направените испитувања во болницата во Кавадарци, ниту еден од пресоналот и пациентите од одделението за Психијатрија нема позитивен тест, согласно времето кога е остварен контактот.
Во Кумановската болница, каде беше згрижена првата пациентка која почина од коронавирус, потенцира Филипче направени се интервјуа, анализирани се првичните и секундарни контакти, сите во врска со починатата пациентка.
“Има дијагностицирани 5 позитивни лица, пациенти од коишто 3 се здравствени работници, 2 доктори и една медицинска сестра. Земени се вкупно 63 бриса од медицински персонал во болницата и членови во семејството“, изјави министерот за здравство.
