Скопје, 26 март, 2020 – Во последните 24 часа, во земјава евидентирани се 29 нови случаи на заразени со коронавирусот. Болеста КОВИД-19 е регистраната кај 20 пациенти од Скопје, тријца од Куманово и Велес, двајца од Прилеп и еден пациент од Дебар.
Најголем дел од регистрираните случаи (11 пациенти) се на возраст од 50-59 години, и тоа 17 се машки, а 12 се женски лица.
Од нив, хоспитализирани се пет лица, а останатите се на домашно лекување (асимптоматски или со лесна клиничка слика). Според информациите од надлежните служби, кај седум од овие лица регистрирано е присуство на коморбидитети (пропратни болести и состојби). Вкупно 19 од овие пациенти имале контакт со веќе потврден случај на COVID-19 во земјава.
Со ова, вкупната бројка на дијагностицирани пациенти со КОВИД-19 изнесува 177 лица од кои 1 излекуван и 3 починати пациенти.
Според место на постојано живеење, случаи на COVID-19 се регистрирани во 9 градови:
- Скопје – 108
- Дебар – 41
- Куманово – 11
- Штип – 7
- Велес – 3
- Кавадарци – 2
- Прилеп – 2
- Гостивар – 1
Досега, регистрирани се 17 случаи на заболување со КОВИД-19 меѓу здравствени работници.
Највисока кумулативна инциденца на 100.000 жители се регистрира во Дебар со 144,7 заболени на 100.000 жители, а во Скопје инциденцата е 17,5 на 100.00 жители, додека во Штип инциденцата на 100.000 жители е 13,3.
- Во однос на дистрибуцијата по пол, регистрирани се 90 лица од машки пол и 87 лица од женски пол или сооднос машки – женски 1:1. Специфичниот морбидитет по пол кај машките е 8,7/100.000 жители, додека кај женските изнесува 8,4/100.000 жители.
- Возраста на заболените се движи од 2 до 91 години (просек – 43,4 години). Најголем број на заболени се на возраст од 30-39 години – 41 (23,2%) и 50-59 години – 40 (22,6%) каде е регистрирана и највисока специфична инциденца од 14,4/100.000 жители.
Од пријавените случаи, 43 или 24,3% се/биле хоспитализирани во текот на болеста, а 134 случаи се на домашно лекување и во домашна изолација, асимптоматски или со полесна клиничка слика.
Во однос на симптомите кои се пријавени кај заболените лица, најчесто се регистрирани
- Кашлица (69,7%)
- Температура (64,8%)
- Слабост (28,7%)
- Болка во грло (24,6%)
- Главоболка (23,8%)
- Треска (20,5%)
- 55 лица се без изразени симптоми.
Во однос на коморбидитети, кај 38 лица се присутни хронична/и здравствени состојби, од кои 26 лица имаат кардиоваскуларна болест, 7 лица се со хронична белодробна болест, 5 со дијабет, 4 со хронична бубрежна болест и 5 со други хронични болести.
