Ново истражување на американскиот Центар за контрола и превенција на болести (CDC) открило дека речиси 41 процент од испитаниците се борат со проблеми поврзани со менатлното здравје кои произлегуваат од пандемијата со новиот коронавирус – како во врска со самата пандемија, така и со мерките кои се превзмени за нејзино спречување, вклучувајќи физичка дистанца и седење дома.
“Забележливо зголемената преваленца на пријавени штетни ментални и бихевиорални здравствени состојби со пандемијата со КОВИД-19 истакнуваат широко влијание на пандемијата и потребата за спречување и лекување на овие состојби“, велат авторите на студијата, објавена во списанието Morbidity and Mortality Weekly Report (MMWR).
Во интернет истражувањето во кое учествувале над 5.400 возрасни лица кои живеат во САД, спроведено во последната недела од месец јуни, 40,9 проценти од испитаниците пријавиле најмалку еден проблем во однесувањето или во врска со своето ментално здравје.
Од нив, 31 процент изјавиле дека искусиле симптоми на анксиозност или депресија, 26 проценти рекле дека доживеале трауми или симптоми на пореметување поврзани со стресот, 13 отсто изјавиле дека почнале или ја зголемиле употребата на психоактивни супстанци, додека 11 проценти рекле дека сериозно размислувале за самоубиство во последните 30 дена.
Најмалку еден негативен ментален или бихевиорален здравствен симптом е регистриран кај 75 проценти од младите на возраст од 18 до 24 години, 52 поценти кај лица од 25 до 44 години. Процентот меѓу оние со постоечки психички проблеми бил уште поголем.
Овие наоди се во слад со претходни истражувања, кои откриле дека симптомите на анксиозни и депресивни пореметувања во САД значајно се зголемени помеѓу април и јуни оваа година, во споредба со истиот период мината година.
