Тестот за откривање на присуство на КОВИД-19 кај пациент, кој инаку го развиле научници од Универзитетот Рутгерс во САД, овозможува уште еден начин на тестирање и дополнително го намалува ризикот да здравствените работници бидат изложени на инфекција од новиот коронавирус. Тестот се темели на детектирање на присутност на РНА молекули од коронавирусот и прво ќе биде достапен во болниците и во клиниките кои се поврзани со универзитетот, и тоа од вчера.
За моментално достапните тестови за скрининг на КОВИД-19, здравствените работници мораат да земат брис од носот или од грлото на пациентот. Ваквата метода налага да квалификуваните работници носат заштитни ракавици и останата заштитна оперма, која во моментов во одредени делови во светот, недостасуваат. Исто така, во некои земји постои и недостиг на тестови, па затоа секое ново решение, е добредојдено.
Во случајот со новоодобрениот тест пациентот мора да плукне во пластична епрувета и едноставно да му ја врати на здравствениот работник кој понатаму ја проследува на лабораториско тестирање.
Процесот е помалку инвазивен од вообичаениот бидејќи се темели само на земање примерок од плунката, а здравствениот работник носи помалку заштитна опрема, за разлика од онаа што ја носи при земање и анализа на сегашниот актуелен тест.
Според упатствата на ФДА, тестирањето ќе се одвива во здравствени установи под надзор на квалификуван кадар.
