Според препораките на Светската здравствена организација, а по повод пандемијата со коронавирусот, од голема важност е често да се мијат рацете, со цел да се заштитиме.
Меѓутоа, на тој начин, доколку напоредно не се води сметка за негата на кожата, може да се создаде уште еден канал за побрз влез на бактериите и вирусите во организмот.
Затоа е многу важно да по миењето на рацете, не заборавиме да нанесеме заштитна крема, но и да изреагираме на првите знаци на оштетување.
Дерматологот, д-р Сара Хоган од медицинскиот центар УЦЛА, дава неколку многу практични совети како да ги миење и негуваме рацете и да ги лекуваме последиците на прекумерното миење раце, како што се болка, црвенило, перутање и чешање.
На кој начин миењето раце ја оштетува кожата?
На површината на кожата се наоѓаат масла и восоци кои ја штитат од надворешни негативни влијанија и ја одржуваат нејзината прирдона влажност. Сапуницата која се создава за време на миење на рацете со сапун ја руши оваа природна бариера, и доколку не нанесеме соодветна крема, кожата станува многу сува, чеша и се перута. Во потешки случаи доаѓа и до пукање и создавање пукнатини на кожата.
Лицата склони на егзема, може да се соочат со потешки форми на симптоми.
Како треба да ги миеме рацете за да избегнеме проблем?
Изберете благ сапун, без мирис за да ја елиминирате нечистотијата. Мијте ги рацете со топла вода, не со жешка, најмалку 20 секунди, потоа добро исплакнете ги и со тапкање со пешкир упијте го вишокот вода. На суви раце веднаш нанесете хидратантна крема, која секогаш треба да ви е при рака.
Што треба да избегнувате доколку дојде до оштетување на кожата?
Сите производи кои содржат мириси може да ја иритираат чувствителната, испукана кожа. Кремите и мастите се подобри од лосионот, а вазелинот најефикасно ја навлажнува кожата.
Навечер, пред легнување, треба да нанесете хидратантна крема и потоа да ставите памучни ракавици за да овозможите поголема апсорпција. Може да ставите и посебни маски за нега на кожата на рацете, еднаш во неделата.
