Голем број луѓе до денес ја прифатија мерката за носење заштитна маска поради превенција од ширење на новиот коронавирус, па веројатно сте забележале и такви кои на лицето носат две маски.
Дали две маски подобро ќе ве заштитат? Зависи.
Ако носите N95 маска или вистинска хируршка, ставањето дополнителен слој веројатно нема многу да направи по прашање на заштититата. Тие маски се направени од многу густи материјали токму за да спречат продирање на вирусот низ нив, па веројатно дополнителна помош не ви е потребна.
Но, ако користите исклучиво платнени маски, онаа дополнителната навистина би можела да “зароби“ повеќе честички од вирусот кои се наоѓаат во здивот и така да овозможи уште подобра заштита за сите кои се наоѓаат во ваша близина.
Недоамнешни истражувања, спроведени токму на ова тема, укажуваат на тоа дека носењето дупла маска делува подобро од само еден слој на материјал. Значи ли тоа дека дополнителната маска нуди уште подобра заштита? За жал, за тоа не постојат конкретни докази, но додека тие не се појават, веројатно е подобро да се носат две маски, особено ако често се наоѓате во високоризични ситуации.
Но, запомнете, велат стручњаците, дека двојната маска не значи дека не треба и не мора да се почитуваат и останатите мерки, како често миење на рацете и одржувањето физичко растојание. Исто така, без оглед колку масите и да носите, погрижете се да ги покрива сите важни места, бидејќи било какви “дупки“ ќе овозможат вирусот да се шири низ воздухот.
И запомнете дека најдобра маска е онаа која се носи постојано, а ако ви е неудобно да носите две маски и поради тоа постојано ги тргате, носете само една, но носете ја правилно.
