Американскиот центар за контрола и превенција на болести – ЦДЦ неодамна објави дека голем број Американци ќе можат да примат бустер доза вакцина против коронавирусот. Тоа се случи откако беше објавено дека лицата со ослабен имун систем имаат право да примат трета доза вакцина и порано. Македонија и други земји најавуваат трета доза, но од кога и за кого засега не се знае.
Но, многумина се прашуваат која е разликата помеѓу бустер и трета доза. Главните разлики не се во дозирањето, туку во времето на примање и прифатливоста. ЦДЦ препорачува трета доза за лица со ослабен имун систем најмалку четири недели откако ја примиле втората доза мРНА вакцина. Бустер пак ќе се препорачува на сите кои примиле две дози Фајзер и Модерна. Овие лица тогаш имаат право да примат бустер, дури и осум месеци откако ја примиле втората доза.
Први на ред за трета доза вакцина во САД се лица кои се умерено до сериозно имунолошки компромитирани. Од друга страна, бустер доза ќе се препорачува на одредени групи од септември, особено на повеќето здравствени работници и лица во старечки домови, бидејќи тие беа меѓу првите што ја примија вакцината и нивната заштита е ослабена со текот на времето.
Бустерите се создадени за да се осигура дека имунитетот не ослабува со текот на времето, за разлика од третата доза на вакцината, наменета за луѓе кои не изградиле доволно силен имунитет по првите дози. Исто така, со текот на времето, вообичаената содржина на бустерот треба да се надогради, односно да се заштити од соеви што се појавија по создавањето на вакцината.
