Научниците во Кина и во САД велат дека нивните откритија би можеле да имаат големо влијание на намалувањето на бројот на нови зарази.
Користејќи податоци за 350 заболени од КОВИД-19 и речиси 2.000 нивни блиски контакти во еден град во Кина, научниците ја процениле “стапката на секундарен напад“ на вирусот, односно веројатноста да заразено лице ја пренесе болеста на некој друг.
Тие откриле дека просечен пациент има само 2,4 проценти шанса да зарази некој кој не живее со него, а тој процент се искачува на 17,1 – околу еден од шест – меѓу оние со кои заразеното лице живее.
Според нивните модели, кои се темелат на податоци собрани во јануари и во февруари, но кои се ажурирани со цел да се бележи нивното најново движење, веројатноста за зараза во исто домаќинство со заболен била највисока помеѓу лица постари од 60 години и најниска помеѓу помлади од 20 години.
Научниците откриле дека севкупните шанси да се зарази член на семејството или лице во истото домаќинство е двојно поголем, отколку при случај на САРС, и три пати поголем во споредба со МЕРС, уште еден коронавирус.
Тие откриле дека веројатноста да носителот на КОВИД-19 зарази член на семејството или цимер е значајно поголема – 39% – пред да му се појават симптомите, отколку после нивната појава.
Тоа сугерира дека вирусот лесно се пренесува во време на инкубацискиот период и дека може да го пренесуваат лица кои не знаат дека се болни, бидејќи немаат симптоми.
Научниот тим вели дека изолацијата внатре во домаќинството го намалила вкупниот број на случаи на КОВИД-19 во оваа студија, за 20-50 проценти во споредба со изостанок на карантин.
“Иако ефектот на изолацијата на случаевите се чини умерен, високата инфективност на вирусот за време на периодот на инкубација, сугерира дека карантинот на асимптоматските пациенти би можел да спречи понатамошна трансмисија на болеста КОВИД-19“, вели Кин-Лонг Јинг од Центарот за кобтрола и превенција на болести на Кина.
Многу европски земји пред воведувањето на со недели долгиот карантин издадоа упатство дека дома треба да се остане само ако лицето е болно, а тоа значи ако има симптоми, типични за вирусот. Истражувањето наведува дека можеби веќе е предоцна за спречување на циркулацијата на КОВИД-19.
Вирџинија Питцер од Школата за јавно здравје на Универзитетот Јеил вели дека “клучната разлика“ помеѓу КОВИД-19 и останатите коронавируси е неговата поголема “веројатност за пренос во периодот на инкубација“.
Таа вели дека истражувањето, објавено во стручното списание The Lancet, “ја потврдува релативната важност на пресимптоматските трансмисии и односот помеѓу повозрасната популација и подложноста, давајќи клучни увиди на кои би требало да се темелат интервенциските стратегии“.
