Во светот досега со новиот коронавирус се инфицирани 58,5 милиони лица, а починале над 1,38 милиони. Опоравени се повеќе од 35,5 милиони пациенти, покажуваат податоците на Универзитетот Џон Хопкинс.
Одредени студии покажуваат дека 80 проценти од лицата кои ќе заболат од КОВИД-19 имаат само благи симптоми или ќе поминат без било какви тегоби. Помал процент имаат сериозни последици.
КОИ СЕ СИМПТОМИТЕ?
Коронавирусот SARS-CoV-2 ги напаѓа белите дробови, а два главни симптоми се покачена телесна температура и сува кашлица. Сува кашлица значи дека лицето нема секрет, наведува Националната здравствена служба на Велика Британија.
Континуирана кашлица значи кашлање кое трае подолго од еден час или најмалку три епизоди на кашлица во текот на 24 часа. Ако вообичаено кашлате, може да биде полошо од вообичаено. Тоа може да доведе до недостаток на воздух, што често се опишува како интензивно стегање во градите, отежнато дишење или чувство на гушење.
Имате покачена телесна температура ако температурата ви е над 37.8 степени. Поради тоа може да чувствувате треска или жештина. Како симптоми се наведуваат и болка во грлото, главоболка и пролив, како и губење на осетот за мирис и вкус.
Според научниците, потребни се пет дена за да се развијат симптоми, а кај некои лица тој период може да трае и подолго.
Периодот на инкубација на вирусот најчесто трае околу пет-шест дена, но може да трае и до 14 дена, наведува Светската здравствена организација.
Овие симптоми нужно не зналат дека сте заболени од новиот коронавирус. Слично се манифестираат и други, многу почести вируси, како настинка и грип.
Најголеми шанси заразеното лице да го пренесе вирусот е токму периодот кога се манифестираат симптоми, но постојат и научни мислења кои укажуваат дека вирусот се шири и пред таа личност да се разболи.
Во рана фаза, симптомите на КОВИД-19 може да личат на почеток на настинка или грип.
Во потешки случаи, болеста може да доведе до воспаление на белите дробови, тежок акутен респираторен синдром, откажување на органите и смрт.
ДАЛИ КОВИД-19 Е ИСТ КАЈ СИТЕ ПАЦИЕНТИ?
НЕ. Коронавирусот влијае на различни органи и има неколку помалку чести симптоми. Научниците на основа на податоци од четири милиони заразени пациенти направиле поделба на шест подвида.
- СЛИЧЕН НА ГРИП, НО БЕЗ ТЕМПЕРАТУРА: Главоболка, губење на осет за мирис, болка во мускулите, кашлица, воспаление на грлото, болка во градите, без температура.
- СЛИЧЕН НА ГРИП СО ТЕМПЕРАТУРА: Главоболка, губење на мирис, болка во мускулите, кашлица, воспаление на грлото, зарипнат глас, температура, губење на апетитот.
- СТОМАЧЕН: Главоболка, губење на осет за мирис, губење на апетит, пролив, воспаление на грлото, болка во градите, без кашлица
- ЗАМОР (ПРВО НИВО НА СЕРИОЗНОСТ): Главоболка, губење на осетот за мирис, кашлица, температура, зарипнатост, замор, болка во градите.
- ЗБУНЕТОСТ (ВТОРО НИВО НА СЕРИОЗНОСТ): Главоболка, кашлица, немање мирис, температура, зарипнатост, болка во градите, замор, збунетост, болка во мускулите.
- АБДОМЕН И РЕСПИРАТОРНИ ПОТЕШКОТИИ (ТРЕТ СТЕПЕН НА СЕРИОЗНОСТ): Главоболка, губење на апетит, кашлица, температура, болка во градите, зарипнатост, воспалени грло, замор, збунетост, болка во мускулите, немање мирис, пролив, болка во абдоминалната регија и задишаност.
Научниците сметаат дека повраќањето, проливот и грчевите во стомакот може да бидат знаци за коронавирус кај децата.
