Појавата на новата варијанта на коронавирусот – омикрон, предизвика сериозна загриженост кај Светската здравствена организација. Стручњаците сугерираат дека таа полесно се пренесува од лице на лице во споредба со делта варијантата. За да се спречи било какво можно ширење, клучно е да се внимава на сите нови и необични симптоми, вклучувајќи ги и оние што се наоѓаат во промените на вашиот пулс или отчукувања на срцето.
Познато е дека КОВИД-19 предизвикува оштетување на срцевиот мускул што влијае на неговата функција. Постојат неколку причини за тоа, појаснуваат лекарите од John Hopkins Medicine.
“Клетките во срцето имаат АСЕ-2 рецептори на кои коронавирусот се закачува пред да влезе во клетките. Оштетувањето на срцето исто така може да биде последица и на високите нивоа на воспаление што циркулира во телото. Како имуниот систем се брои против вирусот, воспалителниот процес може да оштети некои здрави ткива, вклучувајќи го и срцето“, објаснуваат експертите.
Познато е дека вирусот влијае на внатрешните површини на вените и артериите, што може да предизвика воспаление на крвните садови, оштетување на многу малите садови и крвни згрутчувања, а сето тоа може да го загрози протокот на крв во срцето или други делови од телото.
“Откако сте прележале КОВИД-19, ако почувствувате срцебиење, односно забрзана работа на срцето, треба да се обратите кај лекар. Привременото зголемување на бројот на отчукувања на срцето може да биде предизвикано од многу различни работи, вклучувајќи и дехидрација. Погрижете се да пиете доволно течности, особено ако имате покачена телесна температура“, потенцираат лекарите.
Симптомите на срцебиење може да вклучуваат:
- Чувство на забрзани или неправилни отчукувања во градите
- Чувство на малаксалост или вртоглавица, особено кога стоите
- Непријатност во градите
За нормален број на отчукувања на срцето во мирување се смета помеѓу 60 и 100 отчукувања во една минута.
Д-р Анџелик Коци, претседателка на Здружението на лекари на Јужна Африка изјави дека евидентирала пациенти со “необични симптоми“, кои малку се разликувале од оние поврзани со делта варијантата.
Вообичаените рани симптоми кои се пријавени вклучувале замор, болки во мускулите, сува кашлица и гребење во грлото, но истакнат е уште еден симптом на срцебиење.
Проф. Дејвид О’Конор смета дека се уште е рано да се зборува дека е дојдено до промена на симптомите при инфекција со омикрон варијанатата, пред се поради кусото време и не така големиот број на случаи.
Според него, досега направените анализи се на мал број случаи и треба да се даде повеќе време за да се објасни манифестацијата на омикрон варијантата, но тој нагласува дека на секоја здравствена промена при болеста КОВИД-19 треба да се внимава.
