КОВИД-19 болест предизвикана од вирусот SARS-CoV-2, за неколку месеци се прошири во целиот свет и се уште не попушта. До сега стручњаците најмногу сознанија имаат за нејзиното влијание на белите дробови, но нова студија објавена во JAMA Cardiology покажува дека новата болест може да го оштети и срцето, дури и кај лица кои претходно немале срцеви тегоби.
Го зголемува ризикот за смртен исход
“Денес знаеме дека кај КОВИД-19 постои ризик од срцеви оштетувања, без разлика дали претходно постоела срцева болест или не, а кај лицата кои од претходно имаат срцева болест го зголемува ризикот за смртен исход“, вели д-р Мохамед Маџид, автор на студијата и предавач на Универзитетот Тексас во Хјустон. Според Маџид, не само КОВИД-19, туку и останатите респираторни вирусни болести, како што се грипот и САРС, може да ја влошат постоечката кардиоваскуларна болест или да предизвикаат срцеви проблеми кај инаку здрави лица.
Кинески податоци
Тој истакнува дека при повеќето епидемии на грип, повеќе лица умираат од срцеви проблеми, отколку од респираторни компликации, како воспаление на белите дробови. Слична состојба се очекува и меѓу сериозно заболените од КОВИД-19. Според истражувањето на центарот за контрола и превенција на болести на Кина, стапката на смртност на срцеви болни заболени од КОВИД-19 во копнена Кина, во периодот од 30 декември до 11 февруари 2020, била високи 10,5 проценти.
Почнува со респираторни проблеми
“Таквото делување се гледа кај повеќето вируси. Најчесто кај вирусот Epstein-Barr (предизвикувач на мононуклеоза), но и кај грипот, и тоа сигурно не е новина. Разликата се воочува во подоцните фази на болеста – на почетоко КОВИД-19 најмногу се манифестира на респираторните органи, а во подоцните фази посилно влијае на срцето“, вели д-р Брајан Колски, интервентен кардиолог во болницата Св. Џозеф во Калифорнија.
Постојат повеќе причини поради кои вирусите, како грипот или SARS-CoV-2, може да станат смртоносни. Три најчести се: коинфекција (истовремена инфекција) од друг причинител, затајување на белите дробови ослабени од болеста и “цитокинска олуја“, последица на претеран одговор на имуниот систем на инфекцијата.
“Цитокините се протеини кои регулираат цела низа на биолошки функции, меѓу кои и воспаление и обнова. А, воспалителниот одговор на цитокините може да води до оштетување на срцето“, вели д-р Ашес Парик, кардиолог во болница во Тексас.
Затајување на срцето
Кога тоа се случува, кај пацинетот може да дојде до миокардитис, што е потенцијално смртоносна состојба.
“Миокардитисот е воспаление на срцевиот мускул. Може да доведе до слабеење на функцијата на пумпата на срцевиот мускул, односно до затајување на срцето со намалена истисна функција или состолно затајување на срцето“, толкува д-р Сринвас Гудиметла, кардиолог.
Се мери со крвни тестови
Споментатото истражување заклучило дека срцевите оштетувања се вообичаени кај хоспитализираните пациенти заболени од КОВИД-19 во кинескиот Вухан. Користени се податоци на 416 возрасни лица сместени во болницата Ренмин за кои е докажано дека се заболени од КОВИД-19. Срцевите оштетувања биле детектирани според зголеменото ниво на протеинот тропонин, што се мери со крвен тест. Гудиметла вели дека откривањето на абнормалните нивоа на тропонин кај критичните пациенти веројатно не влијаело на промена на третирањето на пациентот.
Студијата покажала и многу голема разлика во смртноста помеѓу лицата со претходно присутни срцеви болести и оние кои немале проблеми со срцето: во првата група починале дури 51% од заболените од КОВИД-19, а во другата група 4,5%.
