Како се повеќе луѓе заболуваат, лекарите и научниците помалку гледаат појасна слика за долготрајните последици на пациентот.
Со анализа на пациенти кои се опоравиле, јасно е дека во текот на болеста сејавуваат различни симптоми од губење на осетот за мирис до депресија. Посериозни состојби се и воспаление на срцевиот мускул, акутна повреда на бубрезите и губење на косата. Но, се чини дека кај голем број пациенти се развива и дијабетес, состојба која мора да се контролира цел живот.
Станува збор за хронична болест која настанува кога панкреасот не произведува доволно инсулин или кога телото не може ефикасно да го употреби произведениот инсулин – хормон кој им овозможува на клетките превземање на глукозата од крвта и нејзина преработка во енергија. Неадекватното производство на инсулин или неговата неефикасност предизвикуваат зголемено ниво на гликоза во крвта (хипергликемија) која може да резултира со долгорочна штета за организмот.
Д-р Михаил Зилберминт кој се грижи за пациентите со метаболички нарушувања, неодамна изјави дека бројот на пациенти се дуплирал од кога трае пандемијата.
Тој додава дека новите пациенти претходно немале проблеми со оваа состојба, а некои и се опоравиле по лекувањето во болница. Но, други пак, сепак добиле дијагноза дијабетес кога биле пуштени од болничка нега.
Неодамна беше објавен извештај во кој стои дека претходно здрав маж на 37 години завршил во болница поради дијабетес, а девојка на 19 години во Германија добила дијагноза дијабетес тип 1, два месеци откако се опоравила од КОВИД-19, а бројот на млади пациенти се зголемил во Детската болница во Лос Анџелес со дијагноза дијабетес тип 2, а сите случаи се поврзани со коронавирусот.
Уште на самиот почеток на пандемијата во Кина, лекарите забележале дека е зголемен бројот на пациенти со зголемено ниво на шеќер во крвта. Лекарите во Италија кон средината на пандемијата го забележале истиот феномен. Според нивните статистики, 5.8 отсто од пациентите по инфекцијата со новиот коронавирус развиле некое ниво на дијабетес.
Во моментов, нова мета анализа од Канада и Индија, како и од Австралија на осум студии што вклучувале 3.700 пациенти со КОВИД-19, дава податок дека 14,4 проценти од пациентите со КОВИД-19, подоцна развиле дијабетес.
НАУЧНИЦИТЕ ВЕЛАТ ДЕКА КОВИД-19 МОЖЕ ДА ВЛИЈА НА РАЗВОЈ НА НОВА ФОРМА НА ДИЈАБЕТЕС
Научниците не можат точно да поврзат како КОВИД-19 може да биде тригер за развој на дијабетес и дали состојбата е последователно трајна или минлива.
Д-р Франческо Рубино, хирург на Кралскиот колеџ во Лондон наведува дека некои од случаите на ново дијагностициран дијабетес кај пациентите не се совпаѓа со вообичаениот профил на дијабетес тип 2, што може да значи дека се појавила нова форма на оваа состојба.
„Постои можност механизмот на дијабетесот да не е вообичаен и може да се работи за некаков вид хибрид и тоа да нè загрижува“, заклучува тој.
