Според истражување објавено во Journal of Clinical Periodontology, кај пациентите заболени од КОВИД-19 најмалку три пати е поголема веројатноста да развијат компликации, ако притоа имаат и болести на непцата.
Студијата спроведена на над 500 пациенти заболени од КОВИД-19, открила дека оние кои имаат и болест на непцата имаат за 3,5 пати поголема шанса да бидат примени на интензивна нега поради коронавирусот. Истовремено, кај тие пациенти е и 4,5 пати поголема веројатноста да имаат потреба од респиратор, а веројатноста од смртен исход е поголема за десет пати од оние кои немаат болест на непцата.
“Оралната нега треба да биде дел од здравствените препораки за да се намали ризикот од тешки исходи од КОВИД-19“, вели проф. Лиор Шапира, претседател на Европската федерација за пародонтологија.
Пародонтитисот е сериозна форма на болест на непцата што погаѓа околу половина од возрасните во светот. Предизвикува воспаление на забното месо, а ако не се лекува, може да се прошири низ целото тело.
Ова истражување ја покажало врската помеѓу породнтитисот и компликациите што ги предизвикува КОВИД-19.
Студијата вклучила 568 пациенти со дијагностициран КОВИД-19 во периодот од февруари до јули 2020 година. 40 пациенти имале компликации, а 528 не. Собрани биле информации за болестите на непцата и други фактори кои би можеле д абидат поврзани со компликации што ги предизивкува КОВИД-19, вклучувајќи индекс на телесна маса, астма, пушење, дијабетес и крвен притисок.
Податоците покажале дека 258 пациенти (45%) имале болест на непцата.
Проф. Мариано Санз, еден авторите на студијата утврдил дека оралните бактерии кај пациентите со пародонтитис може да ги заразат белите дробови, што може да биде исклучително опасно кај оние пациенти кои се на респиратор. Тој советува дека болничкиот персонал би требало да идентификува кои пациенти со КОВИД-19 имаат пародонтитис, за да им се дадат орални антисептици, за да се намали преносот на бактерии.
