Носењето заштитна маска на лицето е еден од најефикасните начини за намалување на ширењето на КОВИД-19 и тоа стана наша нова норма и мора да се навикнеме на живот со неа. Но, тешко е да се занемари дека носењето маска има и некои нуспојави кои можеби досега веќе сте ги забележале и сами, а најчести се акните. За нив во овој корона период е измислен и нов збор – маскни.
Константното триење на било кој вид ткаенина од кожата може да доведе до иритација. Кога на тоа ќе се додаде потта, нечистотијата, природната масност на кожата кои се собираат под маската, иритациите се неизбежни, особено на делот каде маската директно доаѓа во контакт со кожата. Причината поради која доаѓа до иритација е првенствено тоа што дишеме директно во маската, поради што во нејзината внатрешност се задржува топлина.
Многумина се жалат на митисери, осип и други проблеми со кожата кои може да се поврзат со носењето заштитна маска на лицето, а тоа го потврдува и најнова студија на Американската академија за дерматологија.
Лекарите велат дека не мора со часови да носите маска за да имате проблеми со кожата. Доволни се неколку минути додека сте во продавница. Сепак, најпогодени се оние кои мораат заштитна маска да носат повеќе од осум часа дневно.
“Бројните се искуствата на луѓе кои поради носењето маска добиваат акни. Најчесто ги добиваат помладите кои и онака се склони на нив, и тоа во пределот под брадата каде работ на маската се трие од кожата“, велат дерматолозите.
Проблемите се почести кај жените, и тоа кај оние со сува и чувствителна кожа. Кожата на лицето кај мажите е подобра поради тестостеронот поради кој и имаат поотпорна кожа.
Експертите советуваат да се избегнуваат синтетички маски, како и маски од свила и сатен, бидејќи не можат да се перат на висока температура. Најдобро е, додаваат тие, да се користат памучни маски кои по секое носење мора да се исперат на минимални 60 степени.
Дерматолозите за решавање на овој проблем препорачуваат миење на лицето два пати дневно со средство против акни, кое не ја суши кожата. Ако се јави проблем, советот е да се третира само тој дел од лицето.
