Во споредба со просечната брзина на будење на пациенти по “симнување“ од респиратор, на критично болните лица со КОВИД-19 често им е потребно многу повеќе време да ја вратат свеста, утврдиле научниците.
Американските научници прегледале податоци од 795 пациенти хоспитализирани со тешка форма на КОВИД-19 во три медицински центри во текот на првите два брана на пандемијата.
Сите биле на респиратор најмалку шест дена, во текот на кои биле во кома.
Откако биле тргнати од респираторна поддршка, 72 проценти од пациентите на крајот се освестиле, но на 25 отсто од нив им биле потребни најмалку 10 дена да се разбудат, а на 10 проценти, над 23 дена да се опорават.
На пациентите кои доживеале најмногу епизоди на недостаток на кислород им било потребно најмногу време да ја повратат свеста, информираат научниците во нивниот труд објавен во списанието Annals of Neurology.
“Нашите наоди сугерираат дека за пациентите со тежок КОВИД-19 одлуката за прекин на одржувањето во живот не треба да се темели само на продолжените периоди на несвест, бидејќи тие пациенти на крајот може да се опорават“, вели д-р Јан Класен од Медицинскиот центар при Ирвинг Универзитетот во Њујорк.
“Овие наоси ни даваат поточни информации за насочување на семејствата кои одлучуваат дали ќе продолжи терапијата за одржување во живот кај пациентите со КОВИД-19 без свест“, вели д-р Брајан Едлоу.
