Крвавењето во столицата може да биде знак на многу заболувања на дигестивниот тракт. За да се открие за што се работи, треба да се направи детален преглед од страна на гастроентеролог – лекар специјалист, кој ги проучува болестите на органите од системот за варење. Причина за појавата на крв во столицата најчесто се хемороидите и воспалителна болест на дебелето црево, но може да бидат и други посериозни заболувања. Крварењето може да биде повремено, но и континуирано, да е видливо со голо око, но и окултно, т.е. невидливо за голо око, но сепак да постои. Долготрајното крварење во столицата може да биде причина и за појава на слабокрвност. Според тоа, крварењето во столицата е еден алармантен знак кој бара итен лекарски преглед.
Крвавата столица е знак дека некаде во дигестивниот тракт има крвавење.
Доколку крвта е светлоцрвена, проблемот, најверојатно, е во завршните партии на дебелото црево, а доколку е темноцрвена, најверојатно, проблемот е во погорните партии. Понекогаш крвта и не се забележува во изметот, па доколку имате анемија од непозната причина потребен е преглед на дебелото црево. Други причини кои може да доведат до појава на крв во столицата се:
- Ракот на дебелото црево, кој ако се открие во најраниот стадиум процентот на излекување е над 90 %. Ако малигната болест е напредната, процентот на излекување драматично се намалува.
- Присуство на полипи (промени на дебелото црево кои не се малигни, но го зголемуваат ризикот од појава на карцином на дебелото црево).
- Воспалителни цревни болести (Кроновата болест, улцерозниот колитис).
- Цревни инфекции (најчесто бактериски кои се манифестираат со појава на чести и крвави проливести столици).
- Употреба на нестероидни антинфламаторни лекови (пр. аспирин, ибупрофен и други т.н. антиревматици) и др.
Понекогаш столицата може да биде потемно обоена и да помислите дека е во прашање крв, иако нема вистинско присуство на крв. Консумирањето лекови што содржат железо, разни видови храна, како цвекло, капини, малини, боровинки и друго овошје и зеленчук кои се црвено, сино или црно обоени може да го обојат изметот.
Совет
Посетете го вашиот доктор доколку забележите промени во вашата столица. Тоа се најчесто промени во обоеноста, во честотата на празнење (поретко или почесто од вашиот вообичаен ритам), промени во конзистенцијата (појава на проливести столици, потешко празнење и др.). Навремената и точна дијагноза е најзначајниот момент за текот на понатамошно лекување и резултатот на болеста.
