Кога ќе се појави крв во урината никако не станува збор за безопасна состојба и бара посета на лекар, дури и ако појавата сама од себе се повлече. За да се постави дијагноза неопходен е биолошки преглед на крвта и на урината, ултразвучен преглед, но и некои други испитувања за кои лекарот ќе процени. Наодот може да биде обично воспаление на мочниот меур, но може да станува збор и за тумор или проблеми со бубрезите.
Според лекарите, присуството на крв во урината или хематуријата е честа појава и како симптом укажува на некоја патолошка состојба на уринарниот систем. Црвените крвни зрнца во урината може да бидат знак дека во бубрезите има песок или се формирал камен, особено ако е присутна болка, а не е ретко истовремено да постои инфекција на мочниот меур или цистит.
Но, лекарите велат дека овој симптом може да значи и постоење на многу сериозни здравствени проблеми. Крв во урината може да се појави и поради воспаление на бубрезите, кое е потребно веднаш да се испита и лекува.
“Хематуријата може да биде последица на тумор на бубрегот, мочоводот или мочниот меур. Кај овие состојби крвта во урината најчесто не е проследна со болка, а присуството на црвени крвни зрнца во урината може да биде видливо со голо око, но и скриено кое се докажува со микроскопски преглед на урината. Доколку крвта е видлива со голо око, урината е крвава од почеток до крај на уринирањето. Овој тип на хематурија може да трае повеќе од три дена и спонтано да се повлече, а потоа да се јави за неколку месеци“, објаснуваат стручњаците.
Тие велат дека ако крвта се јавува само на почетокот на мокрењето, тогаш причина за тоа е некоја промена во предниот дел на мочоводот. Кога крвта се јавува на крај од уринирањето тогаш проблемот е во задниот дел на мочоводот или мочниот меур, па доаѓа до крварење при контракција на крајот на мокрењето. Крвата урина освен наведените болести може да се појави и поради поради повреди на бубрезите, мочоводот, мочниот меур, но и поради бубрежна туберкuлоза и некои генитални заболувања и состојби.
