Навечер додека ги миете забите или наутро додека го јадете омиленото пециво, непцата почнуваат да ви крварат. Постојано ја занемарувате оваа појава, убедувајќи се себе си дека тоа им се случува на сите. Погрешно! Крврењето од непцата секогаш е знак за предупредување, вели д-р Хенрик Домиш, управител на Одделот за парадентологија во берлинската универзитетска болница Черити.
“Знам дека многу луѓе мислат дека крварењето од непцата е нормално. Но не е така“, укажува д-р Домиш.
Непцата се добро снабдени со крв. Ако не сте ги исекле на некое остро парче храна, крварењето обично е резултат на воспаление предизвикано од насобраниот дентален плак, цврсти наслаги на бактерии кои се хранат со скроб и шеќер од храната.
Крварењето од непцата, меѓутоа, може да биде и симптом на потешки болести како дијабетес или леукемија. Крварење може да поттикнат и некои лекови. Доколку непцата редовно крварат или ако тоа се случува на повеќе места, треба веднаш да се обратите на стоматолог кој ќе ги отстрани тврдокорните наслаги.
Воспалението на непцата обично почнува околу вратот на забот. Ова се нарекува гингивитис и може да доведе до многу сериозни болести на непцата, парадентоза и губење на забот.
Парадонтитисот го оштетува мекото ткиво и ја уништува коската што го потпира забот. Гингивитисот и пародонтитис може да се излекуваат.
За да се намали ризикот од нивно развивање, мијте ги забите најмалку два пати дневно, исчистете го просторот меѓу нив со дентален конец и не заборавајте да одите редовно на преглед кај стоматолог.
