Крвна плазма од пациенти кои се опоравиле од КОВИД-19 не треба да се користи во лекување на болните со коронавирус, бидејќи нема доволно докази дека ги подобрува нивните шанси за опоравување, порачува Светската здравствена организација. Плазмата од оние кои се опоравиле од SARS-CoV-2 не ја намалува ниту потребата за механичка вентилација, нагласува СЗО.
Тезата е дека употребата на плазма поради антителата што ги содржи, може го неутрализира новиот коронавирус, да спречи негово реплицирање и да ја ограничи штетата на ткивото.
Неколку студии не покажале никаква видлива корист во лекувањето на тешко заболените со КОВИД-19. Истражување во САД е прекинато во март, откако е утврдено дека плазмата веројатно нема да им помогне на пациентите со благи и умерени симптоми на болеста.
Методата воедно е и скапа и долого трае, истакнува СЗО во соопштението.
Панел на меѓународни експерти категорично препорача плазмата да не се користи во лекувањето на пациенти со блага форма на болеста, а и не треба, според нив, да се користи ниту во лекувањето на пациенти со тешка и критична форма на болеста, наведува СЗО.
Исклучок се само рандомизираните контролни испитувања, додаваат.
Препораката е објавена во British Medical Journal (BMJ) и се темели на докази од 16 испитувања во кои учествувале 16.236 пациенти со благи, тешки и критични форми на инфекции со КОВИД-19.
