Истражување спроведено во Шведска, во кое беа опфатени речиси четири милиони луѓе на возраст од 40 до 80 години, открива дека животот со куче може да го намали ризикот од срцеви заболувања.
Истражувањето потврдува дека сопствениците на кучиња не се депресивни и дека нивните миленици им помагаат ако се најдат во ситуација да одлучат да се изолираат од светот. Ова практично значи дека сопствениците на кучиња подобро реагираат на стрес, имаат поголема физичка активност и значително го намалуваат нивото на холестерол во крвта.
Една од придобивките на животот со куче е секојдневната обврска да се прошетаат. Една од учесничките во истражувањето потврдила дека со нејзиното куче поминува по десет километри секој ден.
Животот со куче докажано има бенефити за неговиот сопственик. Да се има придружник на четири нозе, гарантира понизок крвен притисок, го редуцира холестеролот и нивото на триглицериди, а го намалува и ризикот од срцев удар.
Лекарите препорачуваат два ипол часа физичка активност во текот на една недела, за секој човек. Сопствениците на миленици се активни многу повеќе од тоа. Тие сакаат да се што повеќе надвор, за да бидат со своето милениче, а со тоа се ослободуваат од стресот и секојдневните домашни и работни обврски.
Времето поминато во природа во прошетка со кучето го подобрува и менталното здравје, ги поттикнува луѓето да се дружат повеќе, да комуницираат меѓу себе и да ја надминат депресијата. Докажано е дека сопствениците на кучиња се екстровертни и дека многу полесно стапуваат во комуникација, особено со други сопственици.
А, како бонус, редовното пешачење со миленикот придонесува и за намалување на телесната тежина, многу полесно отколку принудувањето на организмот на диета или режими на исхрана. Истражувањата велат дека луѓето кои имаат кучиња се поретко седнуваат во автомобил за да се одвезат некаде и да завршат некоја обврска, туку напротив, на пазарување, до банка или кај пријатели одат пеш, заедно со миленикот.
