Квасецот е неопходен во производството на леб, колачи, пиво и други алкохолни пијалаци, како и некои егзотични намирници како што се ферментирана соја и црвен ориз.
Квасецот е жив микроорганизам – поконкретно микроскопски ситна едноклетна габа, која е клучна во ферментација на шеќерите. Меѓу многуте типови на габични квасци најпозната е Saccharomyces cerevisiae од која се добиваат пекарскиот и пивскиот квасец. Индустрискиот квасец се произведува како свеж или сув (кој има подолг рок на траење).
Домашен стартер
Многу луѓе дома подготвуваат сопствен квасец за печење леб без вештачки додатоци. Домашен природен квасец, познат како стартер или база, е кисело тесто кое се добива така што мешавината на вода и брашно „нараснува“ во тегла (некои додават и рендано јаболко или мед). Ова се меси во леб, кој има посебен квалитет и ја задржува свежината подолго.
Квасецот како лек
Квасецот е богат со витамини од Б-групата, протеини, есенцијални аминокиселини и разни минерали, пред се, хром и селен. Истражувањата покажаа дека квасецот, доколку се користи во мали количини (во големи количини не се препорачува, бидејќи е тешко сварлив) може да дејствува како природен антибиотик и прочистувач на органите за варење и да придонесе за рамнотежа на маснотиите и шеќерот во крвта. Некои луѓе, исто така, го препорачуваат и за полесно губење на тежината.
Свежиот квасец се користел како природен лек уште во античко време
Смирувачки маски за лице
Од квасецот може да се направат и маски за лице, за смирување на акни и други воспаленија на кожата, како и за прочистување и разубавување на тенот. Обично, сувиот квасец се меша со млако млеко во смеса која се држи на лицето се додека не се исуши, а потоа темелно се мие со топла, па ладна вода.
