Ларингитот е воспаление на ларингсот (гркланот, гласните жици). Причината за ларингитис може да е различна – вирус, бактерија или обично преоптоварување на гласните жици. Појавата на оваа болест е проследена со болка при голтање и лачење на голема количина плунка во устата. Може да се појави со и без температура. Многу луѓе го потценуваат ларингитисот, но вистината е дека може да биде опасна болест. Најчесто се јавува во лесна форма која поминува за една недела.
Овој воспалителен процес се карактеризира со зарипнатост, но, исто така, може да се јави и ларингеална кашлица (која наликува на лаење на куче), отежнато вдишување воздух и пискав звук при вдишување воздух (т.н. ларингеален стридор). Но, доколку за една седмица не почувствувате подобрување на состојбата, најдобро е да побарате лекарска помош.
Постојат два основни облика на ларингитисот – акутен и хроничен. Причините за акутниот ларингитис може да бидат вируси, поретко бактериски инфекции или напрегање на гласните жици. Хроничниот ларингит е последица на подолга изложеност на надразнувачи, кои може да бидат хемикалии или алергени. Хроничен ларингитис може да се појави и поради чести синусни инфекции, пушење или подолг престој во задимена средина. Од оваа состојба страдаат и лица чија професија е поврзана со постојано говорење, на пример, наставници.
Ларингитисот има различни симптоми, па ако сте болни може да имате неколку или пак сите наброени симптоми.
- Слаб и тивок глас;
- Сувост во грлото;
- Болки при голтање;
- Сува кашлива;
- Иритација во грлото;
- Интезивно лачење на плунка.
Доколку причината за ларингитисот е вирус, симптомите ќе исчезнат сами од себе. Ако станува збор за преоптоварување на гласните жици, состојбата ќе помине за неколку дена така што извесен период нема да зборувате и ќе пиете топли напитоци со мед. Бактериската форма на ларингитисот која е најретка се лекува со антибиотска терапија и кортикостероиди кои ги препишува матичниот лекар, по направените испитувања.
