Треската не е нешто непознато – секој искусил висока температура во животот, најчесто предизвикана од зараза со бактерии или вируси. Сепак, со почетокот на пандемијата со коронавирусот повеќето од нас почнаа да се прашуваат што точно значат вредностите на термометарот и кога треба да бидеме загрижени.
Симптомите на инфекција со коронавирус вклучуваат главоболка, болки во грлото и затнат нос, како и покачена температура. Анализата на податоците од април минатата година на примерок од 17.515 пациенти со коронавирус покажала дека речиси 80 отсто од возрасните и 46 отсто од децата имаат покачена температура по инфекцијата со овој вирус. Меѓу возрасните кои добиле покачена температура, 14,7 проценти имале многу висока температура/треска (39 степени или повисока).
Важно е да се нагласи дека нема сите пациенти со КОВИД да развијат треска, како и дека не сите кои имаат температура ќе бидат позитивни на коронавирусот. Сепак, тоа е многу чест симптом.
Што точно се смета како треска?
Според извори од Националната медицинска библиотека на САД, треската во теорија е телесна температура која е повисока од нормалната. Нормалната телесна температура варира од личност до личност, но генерално останува во рамките од околу 37 степени.
Американскиот центар за контрола и превенција на болести (ЦДЦ) за треска смета температура од 38 степени или повисока. И додека едноставното отчитување на температурата е најдобрата дијагностичка алатка, ЦДЦ, исто така, наведува дека треската може да се дијагностицира ако лицето делува жешко на допир, изјавило дека се чувствува како да има треска, изгледа заруменето или има стаклест поглед.
Д- р Џил Грајмс, лекар по семејна медицина, додава дека постојат и различни распони на треска, од кои некои се посериозни од другите. Мала треска, на пример, е термин кој се користи за опишување на телесна температура над нормалната, но под прагот за треска. “Овде зборуваме за 37 до 38 степени“, вели д-р Грајмс, додавајќи дека во овие случаи не се работи за “вистинска треска“.
“Општо земено, кога лекарите ќе слушнат дека имате температура над 38,3 степени, тогаш ве прегледуваат повнимателно, барајќи инфекција“, објаснува лекарот. Американската академија на семејни лекари додава дека температурите од 38,5 степени и повисоки се сметаат за високи и може да укажуваат на потенцијално опасна инфекција, што значи дека на пациентот му е потребна итна медицинска помош.
Зошто се јавува треска и како изгледа?
Важно е да се напомене дека треската не е болест сама по себе, туку знак дека вашето тело се обидува да се избори со некоја болест или инфекција. Вирусите и бактериите кои предизвикуваат инфекции добро успеваат во човечкото тело при нормална телесна температура. Треската е резултат на обид вашето тело да го убие патогенот така што од вашето тело создава средина во која тој не може да преживее. Треските, исто така, го активираат вашиот имун систем, што е уште еден обид да се убијат патогените.
Треската се манифестира на различни начини во зависност од нејзината сериозност, вели д-р Метју Минц. “Чувство на топлина, заруменетост, студ, тресење, болки во телото – сето ова се вообичаени симптоми, но не секој пациент ќе ги има сите“, вели д-р Минц, додавајќи дека треската може да биде и циклична, што значи дека температурата се зголемува и паѓа. Кога температурата на вашето тело паѓа, може да почнете да се потите.
Сепак, приказната околуу треската може и да се искомплицира, особено кога се зборува за коронавирусот: во случај на други вируси, како што е вирусот на грип, постои краток период од влегувањето на вирусот во телото до појава на симптоми како што е треска. – ова е обично знак дека треба да останете дома додека не закрепнете.
Кога зборуваме за ковид, на телото му треба малку повеќе време да ја препознае инфекцијата. “Кога ќе се заразите со коронавирус, некои симптоми, вклучително и треска, нема да се појават веднаш, туку во првите две недели, а просекот е меѓу четири и шест дена“, предупредува д-р Минц. “Ова значи дека може да бидете инфицирани со коронавирус со денови и потенцијално да ја ширите инфекцијата затоа што не знаете дека сте болни“.
Д-р Минц додава дека понекогаш треската не е меѓу првите симптоми на инфекција со коронавирусот, а понекогаш воопшто не се појавува: некои пациенти ќе почнат да кашлаат неколку дена пред да развијат треска, а некои ќе бидат целосно асимптоматски.
