Инфекцијата на горниот дел од уринарниот тракт која се развива во бубрегот се нарекува пиелонефритис. Болеста е предизвикана од навлегување на бактерии од мочниот меур преку уретерот во бубрегот. Иако состојбата не е толку честа, инфекцијата на бубрезите може да биде доста болна. Симптомите можат да бидат многу слични на инфекција на мочоводот (уретер), па често пациентите кои доаѓаат на преглед дури тогаш откриваат дека се работи за инфекција на бубрезите.
Иако може да му се случи на секого, жените се повеќе склони кон оваа состојба, особено оние на возраст од 15 до 29 години. Доколку ги забележите овие симптоми, можно е да се работи токму за бубрежна инфекција која може да се лекува со антибиотици, но доколку е во прашање посериозна состојба може да бара и болничко лекување.
1. ТРЕСКА И ТЕМПЕРАТУРА
Воспалението на мочниот меур обично не е придружено со температура, па токму тоа може да биде индикатор дека инфекцијата се преселила во бубрезите, советува д-р Чарлс Модлин, уролог и додава дека токму таа е одговор на имуниот систем кој се бори против инфекцијата.
2. БОЛКИ ВО ПРЕПОНИТЕ
Мажите можат да ја почувствуваат оваа состојба длабоко во препоните. Може да мислите дека проблемот е во тестисите, но ако имате други симптоми на инфекција на мочните патишта, вашиот лекар може да ве прегледа за да утврди дали сепак се работи за инфекција на бубрезите.
3. БОЛКА ВО ГРБОТ
Бубрегот зафатен со инфекција ќе стане отечен и чувствителен, а бидејќи се блиску до грбот, острата болка може да се манифестира како болка во грбот, вели д-р Никол Али, нефролог.
“Доволно е малку да го удрите грбот со раката, а ако се појави болка, ќе се посомневаме во инфекција која се преместила во бубрезите“, додава тој.
4. ЧЕСТО УРИНИРАЊЕ
Воспалението на мочниот меур ќе ја иритира слузницата на органот и на тој начин ќе ве принуди често да одите во тоалет, а ова воедно е и еден од првите симптоми на инфекција на бубрезите. Тоа е последица на грчењето на бубрезите кои се обидуваат да се ослободат од инфекцијата.
5. БОЛКА ПРИ МОКРЕЊЕ
Бидејќи инфекцијата на бубрезите е вид на инфекција на уринарните патишта, воспалението ќе се прошири сè до мочниот канал. Бактериите не само што напаѓаат во границите на органите, тие се инфилтрираат во ткивото и нервните завршетоци и на тој начин ги активираат рецепторите за болка, што може да резултира со болно чувство при мокрење.
6. КРВ ВО УРИНА
Повеќето бубрежни инфекции ќе започнат со бактерии кои патуваат од уринарниот тракт до мочниот меур, а потоа до бубрезите. Бидејќи жените имаат пократок мочен канал од мажите, тие припаѓаат на почувствителна група за развој на инфекции. Зачестените полови односи или нов партнер исто така може да го зголемат ризикот, а кога телото се бори со инфекција, црвените крвни зрнца може да завршат во урината.
7. ПРОБЛЕМИ СО ПРАЗНЕЊЕ НА БЕШКАТА
Во ретки случаи, проблемите со мокрењето може да бидат причина, а не симптом на болеста, наведува д-р Али. Кај мажите, зголемената простата може да го притиска мочниот меур, а кај жените може да се случи мочниот меур да се спушти за време на менопаузата: Која било од состојбите ќе спречи целосно празнење на мочниот меур, а урината која останува во телото може да биде дом за бактерии, што ќе доведе до инфекции.
8. МАТНА УРИНА
Заматената урина често е симптом на бубрежна инфекција, а тоа се случува затоа што телото испраќа бели крвни зрнца за да се борат против инфекцијата.
9. ЧУДЕН МИРИС НА УРИНАТА
Повторно, за ова се одговорни бактериите кои се акумулираат во голем број во урината, но не треба веднаш да се јавите на лекар ако ова е вашиот единствен симптом, бидејќи може да се работи за обична дехидрација, која лесно можете да ја решите со пиење доволно вода.
10. НЕЧИСТОТИИ ВО УРИНАТА
Во потешките случаи, може да забележите акумулации во урината кои се резултат на зголемување на бројот на бели крвни зрнца и бактерии, а доколку тоа е случај со вас, може да се работи за сериозно воспаление на бубрезите.
11. ВРТОГЛАВИЦА
Нелекуваната бубрежна инфекција може да се прошири во крвотокот и да направи хаос во организмот. “Воспалението предизвикано од бактерии ги поттикнува крвните садови да се шират, што ќе влијае на намалување на крвниот притисок и појава на вртоглавица“, истакнува д-р Али. Промените што телото ги доживува во овој процес бараат лекарска помош.
