Болката во вратот во повеќето случаи е предизвикана од лошо држење, вклештен нерв или незгодна положба на вратот во текот на денот. Но, во некои случаи непријатното чувство на болка во вратот може да биде индикација за нешто многу посериозно, како срцев удар.
Неодамнешно истражување покажало дека 70 проценти од луѓето знаат дека болките во градите се јасен симптом за срцев удар, а помалку од 30 проценти се свесни за некои други, помалку познати симптоми, како болката во вратот.
ОСТАНАТИ СИМПТОМИ КОИ УКАЖУВААТ НА СРЦЕВ УДАР
Останатите симптоми на срцев удар може да вклучуваат болки во градите или други делови од телото, чувство на зашеметеност или вртоглавица, потење, отежнато дишење, мачнина или повраќање, чувство на вознемиреност, како и кашлица или свирење при дишење.
Иако болката во градите често е силна, некои луѓе може да почувствуваат само блага болка, поради што често и не знаат дека имаат инфаркт. Додека најчестиот симптом на срцев удар и кај мажите и кај жените е токму болката во гради, жените имаат поголема веројатност да почувствуваат други симптоми, како што се отежнато дишење, мачнина, повраќање и болки во грбот.
ЗОШТО ДОАЃА ДО СРЦЕВ УДАР?
До срцев удар доаѓа кога дотокот на крв во срцето станува блокиран, што може да предизвика недостаток на кислород и да доведе до сериозно оштетување на мускулот, па и до смрт.
Некои статистики покажуваат дека вкупната стапка на преживување кај инфарктите е седум до 10 проценти, додека е многу поголема ако во болница се дојде на време. Токму поради тоа, предупредуваат лекарите, вежано е веднаш да се препознаат симптоми и да се реагира што е можно побрзо.
