Жените кои земале литиум во првото тромесечје од бременоста може да го зголемат ризикот од вродени деформации кај нивните деца, покажала новата студија. Вродените деформации се појавиле кај 7 проценти од децата чии мајки користеле литиум во првото тромесечје од бременоста, додека кај деца чии мајки не земале литиум, вродени деформации се појавиле кај 4 проценти од децата.
Инаку, во САД литиумот се користи за лекување на ментални болести речиси 50 години, и тоа главно за лекување на биполарно нарушување, кое се карактеризира со промени во расположението, енергијата и способноста за размислување.
Во САД, речиси 3 проценти од населението страда од биполарно растројство. За луѓето со оваа состојба, литиумот се смета за најефикасен лек за стабилизација на расположението. Но, неговата употреба е ограничена кај бремени жени и жени кои планираат бременост.
Според мислењето на некои експерти за време на првото тромесечје од бременоста може да се намали дозата на литиум, или дури и да се прекине терапијата со литиум, па да се продолжи во второто тромесечје од бременоста.
Инаку, постојат и други лекови за биполарно растројство, но и тие носат одредени ризици, па така лекот „Valproat“ воопшто не смее да се зема за време на бременоста, бидејќи значително го зголемува ризикот од спина бифида (вродена расцепеност на завршетокот на ‘рбетниот столб). Другата опција се антипсихотиците, кои не се ефикасни како литиумот, пишува „The Lancet Psychiatry“.
