Ви тече нос, ве гребе грлото, во главата ви е матно? Ве стигнала настинка и се чувствувате лошо, но треба ли да посегнете по лекови?
Стручњаците велат дека тоа зависи од симптомите.
“Ако имате силна главоболка треба нешто да превземете“, тврдат германските лекари по општа медицина.
Но, за затнат нос се препорачува користење на спреј само навечер, за да што помалку се оштети слузницата. И средствата за спречување кашлица ретко помагаат.
- Најефикасно е да се пијат течности, најдобро вода, а постојат и билни напивки, особено со ментол, кои ги чистат бронхијалните патишта. Чести кај настинка се користат аналгетици и антипиретици (главно ацетилсалицилна киселина и парацетамол).
- Многу е раширена и употребата на поголема количина на витамин Ц, иако постојат различни ставови за оправданоста на таа метода. Некои истражувања не успеале да ја докажат корисноста од витаминот Ц во лекувањето настинка.
- Со лекови или без нив, никој не треба да очекува моментално подобрување.
Најстариот совет е и најдобар, велат лекарите – одморајте и престојувајте во топли простории.
Настинката е акутна вирусна инфекција со воспаление на некои или на сите органи на горниот респираторен тракт и е најчеста од сите вирусни инфекции на горниот дишен тракт, а особено честа во студените периоди од годината.
Познато е дека над 200 вируси може да предизвикаат настинка, која е најчеста во есенскиот период и во зима.
Болеста почнува нагло, по кратка инкубација од еден до три дена, со непријатност во грлото, чувство на полнина во носот, па кивање и секреција од носот. Настинката може да потрае и до 14 дена. Но, ако состојбата долгорочно не се подобрува, треба да се консултира лекар. Вирусните инфекции може да ги следат бактериски, а тогаш се потребни антибиотици.
