Од вчера и официјално почна лекувањето за заболени од КОВИД-19 со крвна плазма, со што земјава стана дел од студијата во повеќе земји во светот во која ќе се утврдува еден од четирите начини за третман на оваа болест со соодветна терапија и со соодветен пристап. Според министерот за здравство, Венко Филипе во болницата “8-ми Септември“ пак, ќе почне и лекување на истата болест со озонотерапија.
За таа цел, директорката на Клиниката за инфективни болести и фебрилни состојби, д-р Милена Стевановиќ се обрати до своите колеги, матичните лекари за ревносно селектирање на нивните пациенти и информирање за нивниот контакт телефон во Клиниката. Според неа, сите понатамошни иследувања би се правеле во координација со Kлиниката за инфективни болести и фебрилни состојби и Институтот за трансфузиона медицина.
“Терапијата со конвалесцентна плазма се покажала безбедна и ефикасна во борбата против болести предизвикани од вирусите EBOLA и SARS. Затоа делува потенцијално ветувачки нејзиното давање и кај пациенти со SARS-CoV-2 инфекција. Нашите напори се насочени во добивање на конвалесцентна плазма преку вашите бази со податоци на пациенти кои ја прележале оваа инфекција. Постапката за донирање на плазма, плазмафереза, е постапка која трае 40 до 60 минути, со издвојување на 300 до 600 мл плазма и враќањето на другите компоненти на донорот, вели д-р Стевановиќ.
Што е конвалесцентна плазма?
По прележувањето на инфекцијата во организмот се создаваат антитела за борба со инфекцијата. Плазмата која содржи антитела кои се борат со инфекцијата се нарекува конвалесцентна.
ЗА ОДРЕДЕНО ЛИЦЕ ДА БИДЕ ДОНОР ТРЕБА ДА ГИ ИСПОЛНУВА ОВИЕ УСЛОВИ:
- Да има прележано КОВИД-19 инфекција
- Да има два негативни тестови во период од 24 часа по инфекцијата
- Најмалку 21 ден да нема симптоми на болеста
- Да биде на возраст помеѓу 18 и 60 години
- Телесната тежина да му биде над 60 килограми
