Малигните болести на крвта секоја година однесуваат голем број жртви, меѓу кои се повеќе деца и млади лица. Во земјава годишно од леукемија заболуваат од 30 до 45 деца, од кои поголемиот дел се машки. Пациентите од овие болести се носат со низа проблеми, од непрепознавање на симптомите и бавно поставување на дијагнозата, до недостапност на лековите или недостаток на психолошка поддршка на заболените.
Еден од првите проблеми секако е непрепознавањето на симптомите, како од страна на пациентите, така и од страна на лекарите од примарната здравствена заштита, поради што пациентите доцна доаѓаат до специјалистички испитувања и до дијагноза, што го отежнува лекувањето.
Како и кај секоја малигна болест, така и кај ракот на крвните клетки важи дека колку болеста порано е откриена, толку шансите за излекување се поголеми. Но, симптоматологијата на хематолошките болести на широката јавност и е непозната и малкумина се оние кои заморот, кашлицата и зачестените инфекции, или на пример, осипот по телото би ги препознале како можни симптоми за лимфом и леукемија.
Таквите симптоми може да се преишат и на други состојби, а најчесто се препишуваат на стресот и не се доживуваат доволно сериозно.
Тука е и бледилото на кожата, студените раце, краткиот здив или бавното заздравување на раните, кои се некои од можните симптоми на леукемија и кои ретко навреме се препознаваат. Освен што таквите нејасни симптоми не ги препознаваат самите пациенти, неретко не ги препознаваат ниту матичните лекари, па до спроведувањето на специјалистички анализи и конечна дијагноза минува многу време и болеста веќе доаѓа во напредната фаза.
За да можете навреме да реагирате, обрнете внимание на овие симптоми:
- Анемија и со неа поврзаните симптоми, како замор, бледило и општо чувство на слабост
- Зголемена склоност на создавање на модринки или краврење, вклучително и крварење од непцата или од носот, или траги на крв во столицата или во урината
- Зголемена склоност кон инфекции, како што се инфекции на грлото или бронхално воспаление на белите дробови, кои може да бидат проследени со главоболка, благо зголемена телесна температура, болки во усната шуплина или осип
- Отечени лимфни јазли, обично на вратот, пазувите или препоните
- Губење на апетитот и телесна тежина
- Чувство на нелагодност во подрачјето под левите долни ребра (предизвикано од отечената слезенка)
- Зголемен број на бели крвни зрнца кој за последица може да има видни проблеми поради крварење на ретината, ѕвонење во ушите (тинитус), промени на психчката состојба, продолжена ерекција и мозочен удар.
