Во прашање е строг диететски режим наменет првенствено за прочистување на организмот, па не е препорачливо да се спроведува подолго од неколку дена. Заради минималниот енергетски внес (лимон и јаворов сируп) неизбежно доаѓа до брзо губење на килограми, заради што програмата почнала и да се применува како диета за слабеење. Иако намалувањето на телесната маса настапува нагло, тоа е главно последица на елиминација на течностите од организмот, а не губиток на масно ткиво. Лимон диетата е детоксикациска програма која уште во 40-те години на минатиот век ја осмислил Стенли Бураугс, под името „The Master Cleanser“, а денешната верзија е објавена во 1976 година.
Диетата се темели на напиток од лимон со додаток на јаворов сируп и чили пиперчиња, што се консумира до 12 чаши дневно, а се друго се одбегнува.
За време на спроведувањето на лимон диетата се пие исклучиво напиток направен од исцеден сок од лимон, јаворов сируп, чили пиперчиња и прочистена вода.
Јаворовиот сируп осигурува енергија од шеќерот, како и одделни витамини и минерали додека пиперчињата ја поттикнуваат разградбата на слузта во телото. Освен напитокот со лимон, се поттикнува и пиење лаксативен чај, а во случај на заситеност од едноличниот вкус се дозволува да се пие чај од нане.
Во случај на напад на глад авторот советува веднаш да се испие напиток од лимон или чаша вода кој ќе го отстрани чувството на глад. Вечерта пред почетокот на спроведување на детоксикацискиот план се препорачува да се испие барем еден растителен лаксативен чај, а секое утро после будењето четврт чаша вода со две лажички морска сол, што ќе предизвика засилено празнење на цревата. Во текот на денот потребно е да испијат 6 до 12 напитоци со лимон, по можност свежо приготвени. Кога ќе се заврши со детоксикацискиот циклус и ќе се почне со воведување на цврста храна, најдобро е да се почне со зеленчукови супи и помали количества свежо овошје и зеленчук, а потоа постепено да се зголемува палетата и количината на намирници.
Мислење на стручњаците
Повеќето стручњаци ќе се сложат дека ваква неурамнотежена исхрана не само што не е прикладна во процесот на слабеење, туку е и потенцијално опасна по здравјето. Колку подолго се спроведува толку се зголемува ризикот од штетни последици. Меѓу другото, долготраен пост може значително да го намали бројот на пробиотски бактерии во дигестивниот систем кој го потпомага варењето на храната. Наглото губење килограми често го следи и губење на мускулна маса.
Заради недостатокот на протеини во прехраната телото го разградува сопственото масно ткиво за да можат метаболичките функции несметано да се одвиваат. Со губитокот на мускулна маса се забавува и базалниот метаболизам, што е токму спротивно од она што сака да се постигне со квалитетно слабеење. Воедно, после секое гладување најчесто следува претерано внесување храна, што повторно доведува до враќање на загубените килограми и продолжува да го негува нездравиот однос кон храната. Спроведувањето на лимон диетата во облик на прочистување на организмот, исто така, не поседува научни темели, со оглед на тоа дека нема докази како „чистењето“ од токсини на кој било начин го подобрува здравјето.
Рецепт за препорачан напиток
Една чаша напиток содржи:
2,8 дл прочистена, филтрирана обична вода
2 големи лажици свежо цеден сок од лимон
2 големи лажици органски јаворов сируп
1/10 лажичка чили пиперчиња во прав
