Интернационалната федерација за дијабетес (ИДФ) ги објави резултатите од глобалното истражување за свесноста за кардиоваскуларните болести меѓу пациентите кои имаат шеќерна болест тип со наслов „Земете го дијабетесот при срце.“
Во истражувањето учествувале 12 695 лица од над 130 земји во светот.
Кардиоваскуларните болести се водечка причина за инвалидитет и смртност кај лицата заболени од дијабетес тип 2. Тие имаат два до шест пати поголем ризик за смртност од кардиоваскуларни болести во однос на лицата кои немаат шеќерна болест. Од 425 милиони заболени од дијабетес, тип 2 болеста зафаќа 90 %.
РЕЗУЛТАТИ
- Две од три лица имаат ризик фактор за развој на кардиоваскуларни болести и/или веќе имале проблеми со нив. Ризик факторите се висок крвен притисок, неконтролирано ниво на шеќер во крвта, висок холестерол, а кардиоваскуларен проблем претставува: ангина пекторис, срцев удар, мозочен удар или затајување на срцето.
- Едно од четири лица никогаш не разговарало или не се сеќава дека зборувало за ризик факторите за развој на кардиоваскуларни болести со својот лекар.
- Едно од четири лица смета дека има мал ризик за појава на кардиоваскуларни болести.
- Три од четири лица се потпираат на информации за овие болести што ги добиле од својот лекар.
Податоците покажале испитаниците заболени од дијабетес тип 2 го потцениле својот ризик од кардиоваскуларни болести и покрај големата зачестеност на проблемите од нив. И покрај што најчесто за информации и совети за кардиоваскуларните болести се потпираат на својот лекар, немало доволно разговор за ризиците што тие ги носат по нивното здравје.
Се предвидува дека глобалната преваленција на дијабетесот ќе достигне 629 милиони лица до 2045 година, што претставува закана за здравствените системи.
Податоците објавени од ова истражување, сметаат од ИДФ ќе помогне во подигање на свеста за ризикот за појава на кардиоваскуларните болести, како и на нивното влијание на лицата со шеќерна болест тип 2 и ќе помогне во постигнување на подобри здравствени резултати.
