Голем дел од луѓето кои се соочуваат со одредени чувства, неволји и тешки моменти, бараат утеха во спиењето. Во навидум беизлезни ситуации, нивниот организам одговара со таканаречената научена беспомошност и тогаш им е најлесно да заспијат. И тоа е во ред, освен една ситница, а тоа е дека наредното утро ќе ги дочека непроменета ситуација, а за време на спиењето, лошите сеќавања уште подобро ќе се втиснат во неколку мозочни региони.
Сеќавањето на негативни и трауматски настани често трае подолго од позитивните и неутралните искуства
Имено, според кинеското истражување спроведено на Универзитетот „Beijing Normal“, потешко е да се избришат лошите сеќавања ако ги преспиеме. Експертите заклучиле дека луѓето најмногу се сеќаваат на оние негативни настани кои не ги „преработиле“ пред спиење, што значи дека траумите и грдите спомени ќе останат да живеат долготрајно во меморијата ако ги преспиеме.
Сеќавањата на негативни и трауматски настани често трае подолго од позитивните и неутралните искуства, заклучиле научниците. Неможноста да се потиснат лошите спомени се поврзува со голем број психијатриски проблеми, вклучувајќи депресија и посттрауматско стресно растројство.
Очигледно и научниците ја докажале народната изрека дека не треба да се оди лут во кревет. На тој начин сигурно нема да ги решите вашите проблеми.
