Научниците од Универзитетите во Западна Австралија и Варшава спровеле студија чии резултати се објавени во стручниот магазин „Intelligence“, а која покажала дека коефициентот на интелигенција на партнерот го проценуваме врз основа на тоа колку тој не усреќува.
Повеќето луѓе кои биле дел од истражувањето интелигенцијата на личноста со која се во врска ја оцениле како „натпросечна“.
Во истражувањето учествувале 218 хетеросексуални парови кои биле во врска во просек шест години, во моментот на студијата. Интелигенцијата на испитаниците е проценувана на стандардни IQ тестови, а од нив се очекувало да ја проценат сопствената и интелигенцијата на личноста која ја сакаат.
Со споредба на резултатите психолозите утврдиле дека луѓето рутински „ја преценуваат“ интелигенцијата на личноста која ја сакаат за околу 30 IQ поени, а генерално сметаат и дека и тие самите се натпросечно интелигентни. Сепак, повпечатлива е разликата во корист на личноста која ја сакаме.
„Генерално, повеќето луѓе сакаат да бидат во врска со личност која им одговара интелектуално, но изгледа дека оние кои ги сакаме по малку и ги ’преценуваме’“, се наведува во студијата.
