Лупусот е автоимуна болест која предизвикува воспаление на зглобовите, тетивите и другото сврзно ткиво. 90% од заболените се млади жени.
Анемија, чувствителност на сонце, сува уста, пореметени функции на бубрезите… Се се ова симптоми на оваа автоимуна болест. Зошто лупусот се јавува, не е познато.
Меѓутоа, факт е дека лупусот може да биде хроничен и напредувачки. Кога станува збор за воспаление на зглобовите, лицата со лупус најчесто велат дека се сеќаваат дека отсекогаш имале проблеми со болки во зглобовите. Долготрајното воспаление на зглобовите може да доведе до трајно оштетување на зглобовите и околното ткиво. Но за разлика од ревматоидниот артритис, кај лупусот не се оштетува коската.
Системскиот лупус еритематозус (СЛЕ) е болест во која се зафатени бројни ткива и органи. Почетокот на болеста зависи од поединец до поединец. Може да биде постепен и тогаш се карактеризира со чувство на замор, малаксаност, губење на телесна тежина. Но болеста може да почне и нагло, со висока температура, болки во зглобовите и во мускулите, промени на бојата на кожата на лицето и црвенило во форма на пеперутка.
Освен тоа, често се јавуваат и кожни промени: фотосензибилитет (чувствитеност на сонце) или оштетување на слузницата на устата. Може да дојде и до паѓање на косата.
Лупусот е болест која, и покрај развиеноста на медицината, не е така едноставна да се открие. Првиот симптом најчесто е неспецифичен. Но кај специјалист треба да се јави доколку тегобите се поврзани со отстапување во некои „обични“ наоди (забрзана седиментација на еритроцитите, промени на крвната слика и урината). Во ваков случај може да се посомнева на лупус како можен причинител на тегобите и болниот да се упати на специјалистички преглед.
Болеста има многу лица. Според лекарите, начелно може да се каже дека кај поголемиот број пациенти болеста со терапија може да се држи под извесна контрола.
Животната прогноза е добра, работната способност кај повеќето болни е зачувана, а освен кај тешки случаи на болеста, квалитетот на живот кај овие пациенти е на сосема прифатливо ниво.
