Пишува: М-р Марија Стојкоска-Василевска
Психолог – психотерапевт
Дебелината или вишокот килограми се симптоми кои често може да кријат психичка заднина. Наглата желба за храна, доколку не е органски предизвикана, може да крие нерешен психички проблем. Кога луѓето ќе се освестат затоа, па сами или со помош ќе ја најдат причината, тогаш својата енергија ја насочуваат на вистинското место.
КОМПЕНЗАЦИЈА ЗА ПРОБЛЕМ
Кога имаме некаква неурамнотеженост, на пример некоја фрустрација која ни се јавува и кога не се соочуваме со вистинските причини за неа, ние избираме начини тоа да го компензираме.
Тогаш почнуваме со зголемено внесување на храна, или прекумерно јадење. Тоа во извесен период може да значи некоја компензација која ни дава привиден баланс. Ние ја поддржуваме несвесноста за тоа да го држиме што е можно повеќе проблемот под тепих. Така се шириме, а не сакаме да прифатиме дека се дебелееме, односно наоѓаме други причини за тоа и го негираме вистинскиот проблем.
Кога ќе се соочиме со килограмите, наместо да трагаме од каде се и зошто, ние се и проектираме на дебелината. Тоа повторно не е соочување со вистинските причини, туку може да значи малтретирање, што повторно ќе даде привиден баланс. И ќе слабееме со изгладување и така ќе се вртиме во круг. Но кога ќе станеме свесни што правиме, тогаш енергијата и агресијата ги насочуваме онаму каде што треба. Грижењето за себе значи и грижење за своето тело, и физички и психички.
ПОКРИВАЊЕ ПСИХИЧКИ ПРОБЛЕМ
Колку што имаме проблеми, толку има несвесни причини за тоа.
Има луѓе кои доживеале траума и кажуваат за тоа. Има некои кои не се ни свесни за вистинската причина за вишокот килограми. Па откако ќе направат низа здравствени анализи, на крајот можеби ќе се сетат дека со желбата за храна покриле психички проблем.
Дебелите не секогаш се гледаат како дебели, па соочувањето со дебелината може да значи шок за нив. Кога станува збор за психички условена дебелина, личноста прво треба да се освести зошто се дебелее, да ги најде вистинските причини и кога тоа ќе се реши да оди кон правилен режим на исхрана и мерки за враќање во нормала.
