Мачнината и повраќањето се чести состојби кои се јавуваат кај разни болести и состојби, а мошне ретко можат да укажат на потенцијално сериозни и фатални болести.
Причините за мачнината и повраќањето се бројни и можат да бидат мигрена, болест на движење (кинетоза), несакани дејства од хемотерапија, дејство на алкохол и некои лекови, гастроентеритис, цревни инфекции и инфестации, вртоглавица, Адисонова болест, алкохолен хепатитис, апендицитис, туморски промени во мозокот и крвавења во мозочното ткиво, хронична бубрежна инсуфициенција, булимија, Кронова болест, депресија, конгенитална адренална хиперплазија, дијабетична кетоацидоза, инфекции на увото, камен во жолчното кесе и жолчните канали, попуштање на срцето и инфаркт на миокардот, Хиршпрунгова болест, бременост, хидроцефалус, хиперпаратироидизам, хипертироидизам, цревна исхемија и цревна опструкција, синдром на иритабилен колон, туморски процеси во црниот дроб, Мениерова болест, менингитис, туморски процеси на панкреасот….
Како што се забележува, причините за мачнина и повраќање се бројни и тие претставуваат мошне чест симптом во медицината.
Како се манифестира мачнината?
Мачнината претставува субјективно чувство кај пациентите што се карактеризира со чувство на тежина, непријатност и болка во горниот дел од стомакот, повеќе од левата страна и со потреба за повраќање. Придружници на мачнината се бледилото, потењето, засиленото лачење плунка (хиперсаливација), забавената работа на срцето (брадикардија), намалениот крвен притисок (хипотензија), отежнатото дишење и гадењето. Мачнината во најголем процент од случаите му претходи на повраќањето кое носи значително олеснување непосредно после празнењето. Централно повраќање настапува во случај на туморски процеси на мозокот или крвавења во черепот и се карактеризира со повраќање без најава, во млаз, често ноќе.
ЛЕКУВАЊЕ:
Бидејќи мачнината му претходи на повраќањето, неопходна е рехидратација на пациентот по парентерален и перорален пат. Лековите кои се користат против повраќање како симптоматска терапија се нарекуваат антиеметици.
