Во Русија се пие повеќе од еден милениум, а ја регулира работата на желудникот и цревата, го спречува размножувањето на штетните бактерии, го поткрева тонусот на организмот, а одлично делува и врз кардиоваскуларниот систем. Бактериолозите утврдиле дека квасот има антибактериски својства. Исто така, го подобрува апетитот, има голема енергетска вредност и способност да го зачува здравјето, затоа што ја враќа силата и го намалува уморот.
Лековит е благодарение на млечната киселина, витаминитe, аминокиселините, шеќерите и микроелементите. Им се препорачува на спортистите, затоа што ја зголемува мускулната маса.
Квасот има густина, низок процент на алкохол и потсетува на ракија од јаболка, а се добива со ферментација на црн или ’ржан леб, изворска вода и билки. Се прави и од ’ржан или јачменов слад, квасец, шеќер или мед, а може да се додаде ѓумбир, кора од лимон или суво грозје.
Навистина, постојат и видови квас кои се прават од зрнесто овошје, како и други видови житарки и репка. Благ е, па можат да го пијат и децата. Најдобар квас се произведува во православните манастири, но може да се направи и дома и тоа е одличен начин да се искористи стариот леб.
Рецепт за јачменов квас
Килограм јачмен се потпекува, се полива со пет литри вода и се вари на тивок оган час и половина. Се процедува, се додава шеќер (може и ким) и се чека да се излади, па се додава пивски квасец, се поклопува и се остава на топло 48 часа. Квасот се става во стаклени шишиња и се остава на ладно место да стои три дена.
