Стручњаците од Хонг Конг вчера вечер објавија дека откриле прв потврден случај во светот на повторна инфекција со новиот коронавирус, но нагласуваат дека е прерано од тоа да се извлекуваат конечни заклучоци.
“Тој случај покажува дека повторна инфекција може да се случи само неколку месеци откако лицето оздравело од првата зараза“, се вели во соопштението на микробиолошкиот оддел на Универзитетот во Хонг Конг (HKU), според кое, помеѓу двете инфекции кај тој маж поминале четири и пол месеци.
Според истражувачите, генетската анализа покажала дека тоа се две сукцесивни инфекции кај ист пациент, предизвикани од два различни соја на SARS-CoV-2 вирусот, одговорен за КОВИД-19.
“Нашите резултати сугерираат дека SARS-CoV-2 би можел да продолжи да циркулира кај населението, како што е случај и со останатите коронавируси одговорни за баналните настинки, иако пациентите стекнале имунитет“, појаснуваат стручњаците од HKU.
“Бидејќи имунитетот не може да трае долго по инфекцијата, вакцинацијата треба да се разгледа и за оние кои веќе биле заразени“, оценуваат тие.
Триесет и три годишниот пациент, жител на Хонг Конг, прв пат на тестот бил позитивен 26 март, откако покажувал симптоми на КОВИД-19, како кашлица, главоболка, болка во грлото и зголемена телесна температура.
Кога оздравел, два пати бил тестиран и два пати бил негативен.Но, на 15. август повторно бил позитивен на тестот. Но, вториот пат тој немал никакви симптоми; неговата болест била откриена поради тест на аеродромот во Хонг Конг кога се враќал од Шпанија преку велика Британија.
“Многу малку е веројатно дека колективниот имунитет може да го елиминира SARS-CoV-2, иако е можно новите инфекции да бидат со послаб интензитет од првата, како што покажа случајот со овој пациент“, наведуваат експертите во студијата.
Студијата вчера ја прифати американското медицинско списание Clinical Infectious Diseases и се чека нејзино објавување.
Последниве месеци се споменуваа повеќе случаи на можна реинфекција во светот, но беа без јасна потврда.
Сепак, експертите и специјалистите, како и Светската здравствена организација предупредуваат дека не трба да се избрзува со заклучоци на основа на еден случај.
