Иако малигните заболувања се јавуваат тивко и прикриено, постојат одредени симптоми кои укажуваат на необично случување во организмот како предупредување на болест. Долго присутните симптоми не треба да се препуштаат на спонтано исчезнување, туку обавезно да се појде на лекар, истакнуваат стручњаците, наведувајќи ги најчестите.
Зголемена температура во континуитет може да биде симптом на лимфом или леукемија. Ако е константна никако не треба да се игнорира.
Слабеење без диета или вежби, со вообичаени животни навики може да биде последица на сериозни случувања во организмот. Неоправданото губење тежина може да укажува на неколку вида карциноми, меѓу кои и на панкреас или желудник.
Кашлицата и зарипнатоста обично укажуваат на алергиски случувања. Меѓутоа упорната кашлица и зарипнатоста кои не престануваат можат да укажат и на карцином на белите дробови или грлото.
Болките кои не се намалуваат, исто така, можат да бидат знак за малигни промени. Честите главоболки, на пример, можат да укажуваат на карцином на мозокот, а болките во грбот на карцином на дебелото црево и јајниците.
Јазлите под кожата на одделни делови од телото треба да разбудат посебно внимание. Особено треба да се посвети внимание доколку се напипаат во пределот на градите, тестисите или близу лимфните јазли. Не треба да се плашите единствено ако се на рацете или нозете затоа што во тие случаи најчесто се работи за безопасни лојни цисти.
Необичните крвавења се еден од многуте знаци за појава на карциноми. Искашлувањето крв може да е последица на карцином на белите дробови, крв во столицата може да упатува на карцином на дебелото црево, во урината на карцином на бешиката. Постојаното вагинално крвавење може да се јави заради карцином на грлото на матката, а крв од брадавиците е последица на карцином на дојка.
