Во светот се открива еден рак на дојка на секои три минути и затоа е важно редовно да се прави овој преглед.
ШТО Е МАМОГРАФИЈА?
Мамографијата е вид на преглед каде со ниски нивоа на рендгенски зраци се утврдува состојбата на ткивото на дојката.Овој преглед мора редовно да го прават сите кои од претходно имаат одредени абнормалности на градите како што се грутки (јазли), бенигни цисти или бенигни фиброаденоми. Исто така, мамографијата е потребно да се направи што е можно поскоро ако почувствувате какви било промени во вашите гради, како што се болка, грутки, промени во бојата на брадавиците или промени во бојата или големината и формата на градите.
Првиот мамографски преглед би требал да се направи помеѓу 38 и 40 година, а секоја жена постара од 40 години на секои две години треба од оди на мамографија, независно од состојбата на градите.
КАКО ИЗГЛЕДА МАМОГРАФИЈАТА?
Мамографот е машина во која се става едно по една дојка, кои потоа се притискаат со плочи од горната и од долната страна, а потоа машината создава рендгенски зраци со кои се снима дојката до детекторот на другата страна. Секоја дојка се снима во две различни насоки, а за секоја се добиваат по две мамографски слики. Овој детектор потоа испраќа сигнали до компјутерот за да формира дигитална слика наречена мамограм. Мамографијата трае од 10 до 20 минути, по што можете да продолжите со вообичаените активности.
Постојат два главни типа на мамографија. Скрининг мамографија која се применува кај здрави жени кои немаат проблеми со градите. Другиот вид е дијагностичката мамографија, која се користи кај промени кои се воочени на ултразвучен преглед или кај жени кои имаат одредени проблеми.
МОЖЕ ЛИ СО МАМОГРАФИЈАТА ДА СЕ ОТКРИЕ РАК НА ДОЈКА?
Мамографијата е одличен помошник во откривањето на ракот, но мамографијата не може да дијагностицира рак. Односно, мамографите можат да покажат одредени промени и абнормалности во ткивото на дојката, но не можат да утврдат дали овие промени се нужно рак.
Наместо тоа, мамограмот е помошно испитување со кое може да се утврди состојбата, но доколку се покажат промени, лекарот врз основа на наодите ќе одлучи дали е потребно дополнително тестирање, како што е биопсија на ткивото на дојката, кое потоа може да утврди дали ткивото е канцерогено или се работи за бенигна творевина.
Сепак, мамографијата е исклучително важна бидејќи може да ги дијагностицира промените уште пред да се појават какви било симптоми, а со тоа лекувањето може да започне навреме и да го спречи ширењето на ракот на околните ткива.
КОЈ СЕ ТРЕБА ДА ОДИ НА МАМОГРАФИЈА?
Освен што овој преглед се препорачува за сите постари од 40 години, мамографија е потребно да се направи и во случај на какви било видливи или опипливи промени, доколку некој во семејството има рак на дојка или рак на јајчниците, кога лицето знае дека има одредени проблеми како што се цисти. За ова е исклучително важно да се прави редовен самопреглед на градите, кој најдобро се прави недела или две пред почетокот на менструацијата.
КАКО ДА СЕ ПОДГОТВИТЕ ЗА МАМОГРАФИЈА?
Иако не постои посебна подготовка, треба да знаете неколку работи. Доколку сте бремени или доите, напоменете му тоа на лекарот, бидејќи во тој случај посоодветен преглед би бил ултразвук.
Доколку имате менструација или треба да ја добиете за неколку дена, подобро е да изберете друг термин за мамографија, бидејќи во овој период градите се многу чувствителни, па прегледот ќе биде нешто понепријатен. Исто така, важно е да му се спомене на радиологот што ја прави мамографијата ако имате импланти во дојките.
