Мамурлакот е збир на незгодни симптоми кои се појавуваат по прекумерна консумација на алкохол. Мамурлакот, вообичаено е силен колку што е испиената количина алкохол, но истовремено колку ќе ве мачи главоболка и болка во желудниот следниот ден, зависи и од севкупната здравствена состојба.
Главниот причинител на мамурлакот, алкохолот е диуретик, па заради тоа честото одење во тоалет е дел од оваа состојба. Со губењето на течностите настапува и дехидрација, а тогаш се јавуваат симптомите како главоболка, жед, вртоглавица и сува уста. Исто така, може да се намали и нивото на шеќер во крвта што резултира со чувство на слабост и недостаток на сила. Симптомите на мамурлакот, вообичаено се најсилни утрото после тешкото опивање.
Единствениот сигурен лек против мамурлакот е времето потребно организмот да се исчисти од токсините на алкохолот. Во меѓувреме, за да се олеснат симптомите може да се пие поголеми количини вода или овошни сокови за да се спречи дехидрацијата. Додека желудникот е вознемирен треба да се јаде ласна храна, како двопек или кекс, кои ќе го смират стомакот и ќе го зголемат нивото на шеќер во крвта. Секако, за да се ублажи главоболката, покрај аналгетик, добро е да се отспие неколку часа во текот на денот. Се препорачува додека трае мамурлакот да не се пие кафе бидејќи може уште повеќе да ја засили главоболката. Наместо тоа може да се изеде чинија бистра супа или една банана, која дава сила, а не ја поттикнува мачнината. Кимот и циметот се добри за смирување на желудникот, а еден од најдобрите лекови за тоа е сода бикарбона. За да се надомести изгубената течност може да се пие и мешавина на вода, лимон и мед.
