Научниците од Универзитетот Минесота создале контрацептивни таблети за кои е докажано дека се 99% ефикасни во спречување на бременост. Според зборовите на д-р Абдула Ал Номан, главен истражувач на проектот, експериментите на луѓе може да започнат “кон крајот на оваа година“. Новата таблета цели на интеракции со витаминот А, клучен за производство на семена течност и плодност.
Иако е потребно одобрување од Агенцијата за храна и лекови на САД за да го започнат истражувањето на луѓе, одреден број мажи веќе доброволно се пријавиле за учество, вели професорот по медицинска хемија на Универзитетот, кој е дел од истражувачкиот тим, проф. Гунда Георг.
“Ако соединението продолжи да ги покажува сите параметри на безбедност, може да се надеваме дека за пет години ќе ги видиме овие таблети на пазарот“, вели д-р Номан.
“Ако се развива лек кој влијае на процесите во организмот, чиј ефект досега не е испитуван, треба да се биде претпазлив што се однесува до безбедноста“, вели проф. Ричард Андерсон од Универзитетот во Единбург.
Медицинските експерти се надеваат дека оваа таблета може да им овозможи на мажите превземање на контролата над сопственото репродуктивно здравје. Освен на овој вид контрацепција, во тек се и клинички испитувања за уште еден контрацептив за мажи, кој е во форма на гел и секојдневно се втријува во рамото.
