Како и кај жените постојат многу причини за машки стерилитет – од хормонска нерамнотежа, до физички и психолошки проблеми и/или проблеми во однесувањето. Иако жената раѓа деца, заради што и на женскиот стерилитет се посветува повеќе внимание, сепак важно е и причините за машкиот стерилитет да се согледаат сериозно. Сепак, мажот е другата страна без која целиот процес на репродукција не би можел да функционира.
Цигари, алкохол, стероиди
Во најчестите причини за машки стерилитет се вбројува пушењето, бидејќи значително го намалува и бројот и подвижноста на сперматозоидите. Потоа тука се вбројува и користењето марихуана, дроги, како и алкохолизмот. Освен болестите на зависности тука се вбројува и неконтролираното земање стероиди, кое предизвикува собирање на тестисите и неплодност. Исто така, и премногу интензивното вежбање доведува до недостаток на тестостерон и неплодност. Некогаш проблем може да е и тесната долна облека затоа што ја зголемува температурата на телото, што резултира со намалена продукција на сперматозоиди. Неухранетоста и анемијата, како и прекумерниот стрес често се причини за неплодност кај мажите.
Хормони
Мал процент на машкиот стерилитет е предизвикан од хормонски пролеми. Неколку работи можат да појдат наопаку со ендокриниот систем. На пример, мозокот можеби не успева правилно да отпушти гонадотропин – ослободувачки хормон (GnRH). Тој го стимулира хормонскиот пат кој предизвиква синтеза на тестостерон и производство на сперма. Пореметувањето во отпуштањето на (GnRH) доведува до недостаток на тестостерон и сперма, односно до престанок на нејзино производство.
Физички пречки
Низа физички проблеми може да доведат до машки стерилитет. Тие или го попречуваат производниот процес на сперма или патот по кој сперматозоидите патуваат од тестисите до врвот на пенисот. Постојат и психолошки проблеми кои можат да влијаат на неплодноста на мажите. Некои од нив се еректилна дисфункција, предвремена ејакулација…
