Со масажа со масло од лаванда ја ублажуваме главоболката, а мирисот нè релаксира и ни го олеснува заспивањето. Маслото од лаванда ја смирува кожата и помага кај изгореници и иритации, особено по сунчање, а се користи и за масажа на воспалени мускули во грбот и на нозете. Добро делува на нервниот систем, така што ги олеснува емоционалната напнатост и стресот и се препорачува масажа пред спиење. Исто така делува како олеснувач при убоди од инсекти. Позитивно е што можат да го користат и децата и бремените, како и луѓето со алергии.
Ефектите на маслото од лаванда се одамна познати, а предност е што може да се направи и дома.
Што ни е потребно?
Суви цветови на лаванда
Ладно цедено масло од бадем, сусам, сончоглед или кокос
Стаклена тегла
Газа за процедување
Во стаклена тегла се ставаат сувите цветови од лаванда и се прелеваат со маслото, така што цветовите да се целосно потопени. Се остава да отстои околу 3 недели, а во меѓувреме се протресува на секои два до три дена. По три недели, маслото се процедува преку газа и се чува во стаклена тегла со потемно стакло.
