Дали вашиот брачен другар или колега е постојано намуртен, поцрвенува во лицето, се жали на несоница, замор, зголемено потење или импотенција? Без сомнение – тој минува низ машки климакс.
После триесеттата година од животот кај повеќето мажи доаѓа до пад на тестостеронот со стапка од 10 отсто по деценија и тоа се смета за нормално намалување. Кога нивото на овој хормон ќе почне да опаѓа побрзо, експертите укажуваат на тоа дека личноста минува низ андропауза. Иако терминот е кованица од 40-тите години во медицинската литература, официјално е влезен дури во 60-те години.
Имено, по триесеттата година од животот со побавното производството на тестостерон доаѓа и до зголемена продукција на глобулин, кој за себе ги врзува сексуалните хормони, така што организмот може да го користи само она што останува. Првиот и секако еден од најнепријатните ефекти на андропаузата е токму слабеењето на либидото. Не само што доаѓа до губење на интерес за сексуалниот живот, туку доаѓа и до проблеми со ерекцијата. За повеќето мажи, еректилната дисфункција може да биде прв предупредувачки знак за доаѓањето на андропаузата.
Андропаузата доведува до губење на мускулната маса и зголемување на процентот на масно ткиво во горниот дел од телото
Ниското ниво на тестостерон се манифестира со:
– намален сексуален нагон
– емоционални, психолошки и промени во однесувањето
– намалување на мускулната маса
– губење на мускулната сила
– зголемување на масното ткиво
– остеопороза или слаби коски и болки во грбот
– кардиоваскуларен ризик
Превенција
Намалувањето на функцијата на тестисите е неизбежно и доаѓа со годините, но може да биде одложено и намалено. Во овој поглед, мора да се менува начинот на живот. Редовно вежбање, одбегнување алкохол, пушење, стрес и одредена диета би требало да резултираат со зголемување на животниот елан, подобрување на расположението, подобрување на спиењето, намалена тензија и нервоза и зголемување на либидото, поправање на еректилна функција и зголемување на мускулната сила. За спречување на предвремен климакс кај мажите особено помага нормализирање на телесната тежина и правилна исхрана.
