Здравјето на простатата е чувствително, но е многу важно прашање за мажите ширум светот. Жлездата која произведува поголем дел од семената течност очигледно е важна, но пореметувањата во тоа подрачје се се почести меѓу мажите постари од 50 години. Зголемената простата може да предизвика зачестено и болно мокрење, а покрај сето тоа, ракот на простата е трет по честота карцином во САД. Диета, вежби и редовни прегледи се најефикасниот начин простатата да остане здрава.
Но, истражувачи од Универизитетот Харвард откриле нова, многу попријатна метода. Во списанието Европска урологија, назначено е дека високото ниво на сексуална активност може да го намали ризикот од добивање рак на простата.
Во студијата учествувале 32.000 мажи, на кои им биле следени сексуалните навики. Заклучокот на студијата бил дека оние мажи кои имаат поголем број на ејакулации во текот на месецот, имаат помали шанси дека ќе добијат рак на простата.
“Откривме дека мажите кои бележат повеќе ејакулации месечно во возрасниот период, помалку е веројатно дека ќе им биде дијагностициран рак на простата. Оваа голема студија е досега најсилен доказ за корисната улога на ејакулацијата во превенција на ракот на простата“, потенцираат авторите на студијата.
Тие веруваат дека 21 ејакулација го штити мажот од рак на простата. Имено, истражувањето покажало дека мажите кои ејакулирале 21 пат месечно, имале за 33% помал ризик од овој тип на рак.
Секако самата ејакулација нема во целост да ја спаси простата, и стручњаците велат дека прекумерната тежина, пушењето, преработената храна со висок процент на маснотии и наследниот фактор, исто така може да доведат до рак на простата.
